គម្រោងបែងចែកដី LASED គឺជាអ្វី? មានអត្ថប្រយោជន៍ដូចម្ដេច ពិសេសក្នុងអំឡុងវិបត្តិកូវីដ?

Samphors Sao
18 ខែមីនា 2021
Uncategorized @km
128 មើល

គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ឬស្គាល់ជាទូទៅថា LASED គឺជាកម្មវិធីផ្ដល់ដីធ្លីជូន ប្រជាជនក្រីក្រ និងជនជាតិដើមភាគតិចនៅតាមបណ្ដាខេត្តនានាទូទាំងប្រទេស។

គម្រោងនេះជាការសហការគ្នារវាងក្រសួងរៀបចំដែនដី នគរូបនីយកម្ម និងសំណង់ ក៏ដូចជាធនាគារពិភពលោក ដែលមកទល់មកបច្ចុប្បន្នបានដំណើរការមកដល់ជំហានទី ៣ ហើយ។

តាំងពីចាប់ផ្ដើមគម្រោងកាលពីឆ្នាំ ២០០៨ មកទល់បច្ចុបន្ន ដីធ្លីសរុបយ៉ាងហោចជាង ៣ ម៉ឺនហិកតា ត្រូវបានផ្ដល់ជូនប្រជាពលរដ្ឋក្រីក្រជាង ៥ ម៉ឺនគ្រួសារ ដោយចំណាយថវិកាសរុបជិត ៤០ លានដុល្លារ។

បើយោងតាមរបាយការណ៍របស់អគ្គនាយកដ្ឋានលំនៅឋាន គម្រោងបែងចែកដី LASED ទី១ (២០០៨-២០១៣) បានប្រើប្រាស់ថវិកាអស់ ១១,៥ លានដុល្លារអាមេរិក ដោយចែកដីសរុប ១៤ ១២៦ ហិកតា ដល់ប្រជាពលរដ្ឋចំនួន ៤៦ ៩៧៦ គ្រួសារ។

ចំណែក គម្រោង LASED II (២០១៦-២០២១) វិញ បានប្រើប្រាស់ឥណទានធនាគារពិភពលោក ២៥ លានដុល្លារ និងថវិការដ្ឋ ១,៨ លាន ដើម្បីកាត់ដីសរុប ១៧ ០៤២ ហិកតា ដល់ប្រជាពលរដ្ឋចំនួន ៥១៤១ គ្រួសារ។

កាលពីខែ មិថុនា ឆ្នាំ ២០២០ កន្លងមកនេះ ធនាគារពិភពលោក ក៏ទើបបានអនុម័តទឹកប្រាក់ ៩៣ លានដុល្លារ ដើម្បីអនុវត្តកិច្ចជំហានទី៣ រយៈពេល ៦ ឆ្នាំបន្តទៀត។ ជំហានទី៣ នេះ នឹងមានទ្រង់ទ្រាយធំជាងមុន ដោយនឹងគ្របដណ្តប់លើសហគមន៍ចំនួន ៧១ តំបន់ នៅគ្រប់ខេត្តទាំងអស់លើកលែងតែរាជធានីភ្នំពេញ។

លើសពីនេះ គម្រោងនេះនឹងគាំទ្រដល់ការកសាងផ្លូវជនបទ ប្រព័ន្ធធារាសាស្រ្តខ្នាតតូច ការផ្គត់ផ្គង់ទឹកនិងអនាម័យ សាលារៀន ផ្ទះគ្រូបង្រៀន មណ្ឌលសុខភាពក្នុងតំបន់ និងមជ្ឈមណ្ឌលសម្រាប់សហគមន៍ផងដែរ។

បើយោងតាមរបាយការណ៍របស់ធនាគារពិភពលោក កន្លងមកគម្រោងនេះ បានជួយស្ដារជីវភាពរបស់ប្រជាជនក្រីក្របានយ៉ាងមានប្រសិទ្ធភាព តាមរយៈការប្រើប្រាស់ដីធ្វើស្រែចំការ។ លើសពីនេះ ក្នុងអំឡុងវិបត្តិកូវីដ កម្មវិធី LASED ក៏បានដើរតួរកាន់តែសំខាន់ ដើម្បីជួយកម្មករដែលបាត់បង់ការងារ ឱ្យមានមុខរបរដើម្បីចិញ្ចឹមជីវិត។

របាយការណ៍ដដែលបានឱ្យដឹងថា ក្នុងអំឡុងឆ្នាំ ២០២០ ប្រជាជនយ៉ាងហោច ៥០ គ្រួសារបានវិលត្រឡប់មកដីស្រែចំការដែលពួកគេទទួលបានពីកម្មវិធី LASED វិញ ព្រោះពួកគេបានបាត់បង់ការងារដែលធ្វើនៅទីក្រុង។

ឧទាហរណ៍ដូចជា លោកយូធី និងភរិយា បានវិលត្រឡប់មកស្រុកកំណើតនៅខេត្តត្បូងឃ្មុំវិញ កាលពីមិថុនា ឆ្នាំ ២០២០ ក្រោយបាត់បង់ការងារ ក្នុងវិស័យទេសចរណ៍ក្នុងខេត្តសៀមរាប។ ពួកគេទាំង ២ បានដាំបន្លែ ចិញ្ចឹមត្រី និងមាន់ ដែលបានផ្ដល់ចំណូលឱ្យពួកគេ ២០០ ទៅ ៣០០ ដុល្លារក្នុងមួយខែ។

ដូចគ្នាដែរ អ្នកស្រីយ៉ុន ឡេងសុង និងស្វាមី ក៏ជាក្រុមគ្រួសារមួយក្នុងខេត្តក្រចេះដែលបានទទួលដីគម្រោង LASED ។ ក្រោយបាត់បង់ការងារជាកម្មករនៅប្រទេសថៃ អ្នកទាំង ២ បានត្រឡប់មកស្រុកកំណើតវិញ ដើម្បីដាំដំណាំដំឡូងមី។ ពួកគេរំពឹងថា ឆ្នាំនេះដំឡូងនឹងអាចប្រមូលផលបានប្រមាណ ១០ តោន ឬស្មើនឹងចំណូលបានជាង ៤ លានរៀលដែរ។

គួរបញ្ជាក់ផងដែរថា ដោយសារតែឃើញសមិទ្ធផលជាផ្លែផ្កាដូច្នេះ ធនាគារពិភពលោក ក៏ដូចជាក្រសួងរៀបចំដែនដី នគរូបនីយកម្ម និងសំណង់ បានបេជ្ញាថានឹងអនុវត្តការងារជាបន្តបន្ទាប់ ពោលគឺដើម្បីសម្រេចឱ្យបាននូវគោលដៅធ្វើឱ្យប្រទេសកម្ពុជាក្លាយជាប្រទេសមានចំណូលមធ្យមនៅឆ្នាំ ២០៣០។

- Video Advertisement -