គម្រោងសង់អាងប្រព្រឹត្តិកម្មទឹកស្អាតក្រោមជំនួយជប៉ុននៅសៀមរាប គ្រោងបញ្ចប់នៅខែមេសា២០២៣

Sommana Yan
20 ខែកុម្ភៈ 2023
ព័ត៌មានក្នុងស្រុក
264 មើល

គម្រោងសាងសង់អាងប្រព្រឹត្តិកម្មទឹកស្អាត នៅក្នុងខេត្តសៀមរាប ក្រោមជំនួយចំនួន ៥៨ លានដុល្លារអាមេរិករបស់ប្រទេសជប៉ុន គ្រោងនឹងបញ្ចប់ការសាងសង់ នៅក្នុងខែមេសាឆ្នាំ ២០២៣ ខាងមុខនេះហើយ។

នេះបើយោងតាមការបញ្ជាក់របស់ ឯកឧត្តមទេសរដ្ឋមន្រ្តី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី១៨ ខែកុម្ភៈ ឆ្នាំ២០២៣។

គម្រោងនេះមានទីតាំងស្ថិតនៅភូមិ បុស្សអង្កាញ់ សង្កាត់ជ្រៀវ ក្រុងសៀមរាប ខេត្តសៀមរាប និងមានសមត្ថភាពផលិតទឹកស្អាតចំនួន ៦ម៉ឺនម៉ែត្រគូប ក្នុងមួយថ្ងៃ ដោយយកប្រភពទឹកពីបឹងទន្លេសាប។ នេះជាឥណទានសម្បទានរបស់ទីភ្នាក់ងារសហប្រតិបត្តិការនៃប្រទេសជប៉ុនប្រចាំនៅកម្ពុជា (JICA) ដែលត្រូវបានចុះហត្ថលេខាដោយរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ឯកឧត្តម អូន ព័ន្ធមុនីរ័ត្ន និងប្រធានទីភ្នាក់ងារ JICA លោកស្រី Kamei Haruko តាមប្រព័ន្ធអនឡាញ នៅថ្ងៃទី ២១ ខែតុលា ឆ្នាំ២០២១។ (អានបន្ថែម)

ឯកឧត្ដមបណ្ឌិតទេសរដ្ឋមន្រ្តី ចម ប្រសិទ្ធ បានវាយតម្លៃខ្ពស់ និងថ្លែងអំណរគុណចំពោះកម្ចី ដ៏មានសារ:សំខាន់របស់ប្រទេសជប៉ុន ជាមួយនឹងបច្ចេកទេសសាងសង់របស់ជប៉ុនផងដែរ ដើម្បីធានាការផ្គត់ផ្គង់ទឹកស្អាតទៅទីក្រុងសៀមរាបនិងតំបន់ជុំវិញ ដែលកំពុងមានតម្រូវការខ្ពស់នាពេលបច្ចុប្បន្ន។ ឯកឧត្ដមសង្ឃឹមថា គម្រោងនេះ នឹងត្រូវបញ្ចប់ក្នុងកំឡុងខែមេសាខាងមុខតាមការគ្រោងទុក៕

- Video Advertisement -