ត្រឹមដើមឆ្នាំ ២០២១ ជប៉ុនវិនិយោគផ្ទាល់នៅកម្ពុជាដល់ទៅ ១៤៤ គម្រោង ឬស្មើនឹង ៣ពាន់លានដុល្លារ

• Samphors Sao
• 15 ខែ​កុម្ភៈ 2021
• ព័ត៌មានក្នុងស្រុក
• 218 មើល

បើគិតត្រឹមចុងខែ មករា ឆ្នាំ២០២១ កម្ពុជាទទួលបានការវិនិយោគផ្ទាល់ពីប្រទេសជប៉ុនសរុបចំនួន ១៤៤ គម្រោង ឬស្មើនឹងទុនវិនិយោគប្រមាណជិត ៣ពាន់លានដុល្លារអាមេរិក។

នេះបើតាមឱ្យដឹងពី សេចក្តីប្រកាសព័ត៌មានកិច្ចប្រជុំលើកទី២១ នៃគណៈកម្មាធិការចម្រុះកម្ពុជា-ជប៉ុន កាលពីថ្ងៃទី ១១ កុម្ភៈ កន្លងទៅ ដែលដឹកនាំដោយឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងឯកឧត្តម ម៉ាសាហ៊ីរ៉ុ មីខាមី (Masahiro MIKAMI) ឯកអគ្គរដ្ឋទូតជប៉ុនប្រចាំកម្ពុជាផងដែរ។

ក្នុងចំណោម គម្រោងចំនួន ១៤៤ គម្រោងចំនួន ៦៦ ស្ថិតក្នុងតំបន់សេដ្ឋកិច្ចពិសេស ឬស្មើនឹងទុនវិនិយោគសរុប ៣៤០ លានដុល្លារ។

លោក ឈួ វិចិត្រ ប្រធានក្រុមហ៊ុនតំបន់សេដ្ឋកិច្ចពិសេសសានកូប៉ោយប៉ែត បា្រប់កាសែត ភ្នំពេញ ប៉ុស្តិ៍ ថា ក្រុមហ៊ុនជប៉ុនចំនួន ៩ កំពុងមានប្រតិបត្តិការនៅតំបន់នោះ ដោយរោងចក្រទាំងនោះភាគច្រើនជារោងចក្រផលិតគ្រឿងផ្គុំយានយន្ត គ្រឿងផ្គុំអេឡិចត្រូនិក និងអគ្គិសនី។

គួរបញ្ជាក់ផងដែរថា គិតត្រឹមខែតុលា ឆ្នាំ ២០២០ រដ្ឋាភិបាលជប៉ុន បាននិងកំពុងផ្ដល់ថវិកាយ៉ាងហោចជិត ១ ពាន់លានដុល្លារអាមេរិកដល់កម្ពុជា ដើម្បីជួយសាងសង់ ស្ដារ និងលើកកម្ពស់ហេដ្ឋានរចនាសម្ព័ន្ធស្ពាន-ថ្នល់ជាច្រើននៅកម្ពុជា។ (អានបន្ថែម)

• Road and Infrastructure
• Projects Development