ផ្លូវជនបទ៤ខ្សែ ប្រវែងជាង ៥៧គ.ម នៅខេត្តស្វាយរៀង បញ្ចប់ការសាងសង់១០០ភាគរយហើយ

• Sommana Yan
• 8 ខែ​កុម្ភៈ 2024
• ព័ត៌មានក្នុងស្រុក
• 88 មើល

គម្រោងកែលម្អផ្លូវជនបទជំហានទី៣ (RRIP 3) ចំនួន ០៤ខ្សែ មានប្រវែងសរុបជាង ៥០គ.ម នៅខេត្តស្វាយរៀង ត្រូវបានសាងសង់រួចរាល់ហើយ។

ផ្លូវទាំង ០៤ខ្សែនេះ ត្រូវបានចុះពិនិត្យនិងប្រគល់-ទទួល ដឹកនាំដោយកឧត្តម សុង សុផល អនុរដ្ឋលេខាធិការក្រសួងអភិវឌ្ឍន៍ជនបទ និងជាប្រធានគ្រប់គ្រងគម្រោង កាលពីថ្ងៃទី១-២ ខែកុម្ភៈ ឆ្នាំ២០២៤។

ផ្លូវជនបទទាំង៤ខ្សែនេះ មានប្រវែងសរុប ៥៧,២១៩ គីឡូម៉ែត្រ មានដូចខាងក្រោម៖

ខ្សែទី១ (SVR2)៖ ផ្លូវក្រាលកៅស៊ូពីរជាន់ (DBST)ប្រវែង ១១,០៨៧ គីឡូម៉ែត្រ គិតចាប់ពីក្រោលគោ ដល់វត្តស្វាយផ្អែម ស្រុកស្វាយជ្រំ ខេត្តស្វាយរៀង។

ខ្សែទី២ (SVR3)៖ផ្លូវក្រាលកៅស៊ូពីរជាន់ (DBST) ប្រវែង ៩,១៦៦ គីឡូម៉ែត្រ គិតចាប់ពីផ្សារចក ដល់ពងទឹក ស្រុករំដួល ខេត្តស្វាយរៀង។

ខ្សែទី៣ (SVR4)៖ ផ្លូវក្រាលកៅស៊ូពីរជាន់ (DBST) ប្រវែង ២៤,៩៥៩ គីឡូម៉ែត្រ គិតចាប់ពីព្រៃគាវ ដល់កំពង់អំពិល ស្រុករំដួល ខេត្តស្វាយរៀង។

ខ្សែទី៤ (SVR5)៖ ផ្លូវក្រាលកៅស៊ូពីរជាន់ (DBST) ប្រវែង ១២,០០៧ គីឡូម៉ែត្រ គិតចាប់ពីព្រះពន្លា ដល់សំយោង ស្រុកកំពង់រោទិ៍ ខេត្តស្វាយរៀង។

គួរបញ្ជាក់ថា គម្រោងកែលម្អផ្លូវជនបទជំហានទី៣ ស្ថិតក្រោមហិរញ្ញប្បទានសម្បទានពីធនាគារអភិវឌ្ឍន៍អាស៊ី (ADB) ដែលបានចាប់ផ្តើមធ្វើការស្ថាបនាចាប់ពីខែសីហា ឆ្នាំ២០២០ និងបានបញ្ចប់នៅចុងឆ្នាំ២០២៣។

• Road and Infrastructure
• Projects Development