រដ្ឋគ្រោងវិនិយោគផ្ទាល់សរុប ១៤០០លានដុល្លារ នៅឆ្នាំ២០២១ ភាគច្រើនជាគម្រោងហេដ្ឋារចនាសម្ព័ន្ធ

• Samphors Sao
• 1 ខែ​កុម្ភៈ 2021
• ព័ត៌មានក្នុងស្រុក
• 168 មើល

ក្នុងឆ្នាំ ២០២១ នេះ រដ្ឋាភិបាលគ្រោងនឹងវិនិយោគលើគម្រោងអភិវឌ្ឍន៍នានាសរុបជាង ១៤០០ លានដុល្លារអាមេរិក ដែលនេះគឺរួមបញ្ចូលទាំងថវិកាវិនិយោគផ្ទាល់ក្នុងស្រុក និងថវិកាបដិភាគរបស់រដ្ឋាភិបាលផងដែរ ហើយការវិនិយោគនេះទៀតសោតភាគច្រើនជាគម្រោងអភិវឌ្ឍន៍ហេដ្ឋារចនាសម្ព័ន្ធ។

នេះបើតាមប្រសាសន៍របស់ សម្ដេចនាយករដ្ឋមន្ត្រី ហ៊ុន សែន ក្នុងពិធីបើកការដ្ឋានសាងសង់រោងចក្រប្រព្រឹត្តកម្មទឹកស្អាតបាក់ខែង កាលព្រឹកថ្ងៃទី ១ កុម្ភៈ នេះ។
សម្ដេចបានឱ្យដឹងថា៖ «ឆ្នាំ ២០២១ នេះ យើងគ្រោងវិនិយោគផ្ទាល់ចំនួន ១ ៤០០ លានដុល្លារ ក្នុងនោះ ថវិកាបដិភាគគ្រោងនឹងត្រូវចំណាយគឺ ២១១ លានដុល្លារ»។

សម្ដេច ក៏បានសង្កត់ធ្ងន់ថា ទឹកប្រាក់នេះគឺជាការវិនិយោគផ្ទាល់ក្នុងស្រុក ដោយមិនទាន់រាប់បញ្ចូលការវិនិយោគពីក្រៅប្រទេសឡើយ។

សម្ដេចបានបន្តថា៖ «រៀងរាល់ឆ្នាំ រដ្ឋាភិបាលតែងតែត្រៀមថវិកាដើម្បីវិនិយោគលើគម្រោងនានា ឧទាហរណ៍ គម្រោងសាងសង់ផ្លូវ ជួសជុលផ្លូវ ធ្វើប្រឡាយទឹក អណ្ដូងទឹក សាលារៀន និងមន្ទីរពេទ្យជាដើម យើងត្រូវវិនិយោគផ្ទាល់ខ្លួនផងដែរ។ បើយើងមានលុយច្រើនគឺយើងធ្វើច្រើន»។

បើយោងតាមសម្ដេច ហ៊ុន សែន នៅក្នុងឆ្នាំ ២០១៩ កម្ពុជាបានវិនិយោគផ្ទាល់ ៥៩៤ លានដុល្លារ ដែលក្នុងនោះ ១៧៩ លានដុល្លារ ជាថវិការបដិភាគ។ ដោយឡែក ឆ្នាំ ២០២០ សម័យកូវីដ កម្ពុជាវិនិយោគផ្ទាល់ដល់ ១៤២៥ លានដុល្លារ ដែលក្នុងនោះថវិកាបដិភាគមាន ២១៥ លានដុល្លារ»។

លើសពីនេះ សម្ដេចក៏បានបញ្ជាក់ថា រាល់គម្រោងវិនិយោគទាំងអស់ សុទ្ធតែទាមទារឱ្យមានបដិភាគពីរដ្ឋាភិបាល ដោយមិនអាស្រ័យតែលើការវិនិយោគទាំងស្រុងពីបរទេសនោះទេ។ (អានបន្ថែម)

• Road and Infrastructure
• Projects Development