រដ្ឋាភិបាលកម្ពុជា នឹងអភិវឌ្ឍខេត្តកំពង់ធំ ទៅជាមជ្ឈមណ្ឌលទេសចរណ៍ដ៏រស់រវើក

Sommana Yan
24 ខែមករា 2025
Uncategorized @km
367 មើល

រដ្ឋាភិបាលកម្ពុជាបានកំណត់ទិសដៅប្រែក្លាយខេត្តកំពង់ធំទៅជាមជ្ឈមណ្ឌលទេសចរណ៍ដ៏រស់រវើកដោយប្រកាសក្រុមការងារពិសេសចំនួនពីរ ដើម្បីរៀបចំផែនការអភិវឌ្ឍន៍ទេសចរណ៍ដ៏ទូលំទូលាយ។ គំនិតផ្តួចផ្តើមនេះ ត្រូវបានបង្កើតឡើង ក្នុងគោលបំណងបង្ហាញពីសក្ដានុពលខេត្តកំពង់ធំដែលសម្បូរទៅដោយវប្បធម៌ ប្រវត្តិសាស្ត្រ និងធនធានធម្មជាតិ ជាពិសេស ខេត្តនេះមានទីតាំងភូមិសាស្រ្ត ស្ថិតនៅចំកណ្តាលនៃប្រទេសកម្ពុជាតែម្តង។

ផែនការដ៏សំខាន់នេះត្រូវបានប្រកាសឡើងក្នុងកិច្ចប្រជុំពិគ្រោះយោបលរៀបចំផែនការជំរុញការអភិវឌ្ឍវិស័យទេសចរណ៍ខេត្តកំពង់ធំ ក្រោមអធិបតីភាពរបស់ ឯកឧត្តមឧបនាយករដ្ឋមន្ត្រី វង្សី វិស្សុត នៅថ្ងៃទី២១ ខែមករា ឆ្នាំ២០២៥។

នាឱកាសនោះ ឯកឧត្តមឧបនាយករដ្ឋមន្ត្រី បានសង្កត់ធ្ងន់លើតម្រូវការសំខាន់ៗសម្រាប់ផែនការអភិវឌ្ឍន៍ទេសចរណ៍ដែលតម្រូវឱ្យមានរចនាសម្ព័ន្ធល្អៗ។ ឯកឧត្តមបានលើកឡើងថា “ខេត្តកំពង់ធំ មិនគួរគ្រាន់តែជាផ្លូវឆ្លងកាត់សម្រាប់អ្នកដំណើរដែលធ្វើដំណើរទៅកាន់ទីក្រុងសៀមរាប ឬភ្នំពេញនោះទេ។ យ៉ាងណាក៏ដោយ នៅក្នុងផែនការអភិវឌ្ឍមួយនេះ យើងចង់ប្រែក្លាយខេត្តកំពង់ធំឱ្យក្លាយទៅជាខេត្តគោលដៅកម្សាន្តអន្តរខេត្តទី១ មុននឹងទេសចរទៅដល់ខេត្តសៀមរាប ឬខេត្តព្រះវិហារ ឬក៏ដល់ភ្នំពេញ ឬជាខ្សែច្រវាក់គោលដៅទេសចរណ៍មួយ តាមទិសពីភ្នំពេញទៅសៀមរាប-អង្គរ ឬពីសៀមរាប-ភ្នំពេញ ឬក៏ភ្ជាប់ទៅគោលដៅទេសចរណ៍ផ្សេងៗទៀត។

ដើម្បីធានាការអនុវត្តផែនការនេះប្រកបដោយប្រសិទ្ធភាព ឯកឱត្តម វង្សី វិសុទ្ធ បានប្រកាសបង្កើតក្រុមការងារពិសេសចំនួនពីរគឺ ក្រុមទី១) នឹងត្រូវផ្តោតលើការអភិវឌ្ឍន៍តំបន់សំបូរព្រៃគុក ដែលមានភាពល្បីល្បាញផ្នែកវប្បធម៌ និងប្រវត្តិសាស្ត្រ។ គំនិតផ្តួចផ្តើមនេះមានគោលបំណងថ្ពក់ជាមួយសហគមន៍ និងតំបន់សក្តានុពលទេសចរណ៍ជុំវិញនោះបន្ថែមទៀត ឱ្យក្លាយជាផែនការអភិវឌ្ឍន៍ពហុទេសចរណ៍។

ក្រុមទី២) នឹងត្រូវផ្តោតលើការសិក្សារៀបចំផែនការអភិវឌ្ឍន៍តំបន់ក្នុងក្រុងស្ទឹងសែន ឱ្យមានលក្ខណៈរស់រវើក និងកាន់តែទាក់ទាញបន្ថែមទៀត តាមរយៈការបង្កើតផលិតផលទេសចរណ៍ថ្មីៗដូចជា៖ ផ្សាររាត្រី និងការជិះទូកគយគន់ទេសភាពជាដើម។ល។

លើសពីនេះ ឯកឧត្តម បានណែនាំបន្ថែមដល់ក្រុមការងារ ឱ្យរៀបចំកែសម្រួលសេចក្ដីព្រាងផែនការនេះឡើងវិញ ដោយត្រូវកំណត់ឱ្យបានច្បាស់លាស់នូវផែនការយុទ្ធសាស្ត្រ, ផែនការសកម្មភាព, ស្ថាប័នអនុវត្ត និងយន្តការតាមដានការអនុវត្ត ស្របតាមស្មារតីអង្គប្រជុំ រួចធ្វើការពិនិត្យចុងក្រោយ ដើម្បីរៀបចំស្នើសុំការអនុម័តពីក្រសួងទេសចរណ៍ផងដែរ។

ជាមួយនឹងវិធីសាស្រ្តប្រកបដោយមហិច្ឆិតាក្នុងការអភិវឌ្ឍន៍វិស័យទេសចរណ៍នេះ ខេត្តកំពង់ធំត្រូវបានកំណត់ថានឹងលេចចេញជាតួអង្គដ៏សំខាន់ក្នុងទេសភាពទេសចរណ៍របស់ប្រទេសកម្ពុជា ដោយបានអញ្ជើញអ្នកធ្វើដំណើរមកស្វែងរកការផ្តល់ជូនពិសេសរបស់ខ្លួនជាជាងគ្រាន់តែធ្វើដំណើរឆ្លងកាត់។