រោងចក្រផលិតកង់រថយន្តនៅបាវិត ជិតបញ្ចប់ការសាងសង់ហើយ, រពឹងនាំមកនូវការងារថ្មី ១៥០០កន្លែង

Sommana Yan
26 ខែកញ្ញា 2025
ព័ត៌មានក្នុងស្រុក
120 មើល

មកទល់បច្ចុប្បន្ន ការសាងសង់រោងចក្រផលិតសំបកកង់រថយន្ត Wanli Tire ក្នុងតំបន់សេដ្ឋកិច្ចពិសេសបាវិត (SEZ) ជិតបញ្ចប់ហើយ នេះបើយោងតាមការបញ្ជាក់របស់តំណាងក្រុមហ៊ុន ក្នុងជំនួបជាមួយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។ គម្រោងនេះត្រូវបានគេរំពឹងថានឹងនាំមកនូវឱកាសការងារថ្មីៗ រហូតដល់១៥០០កន្លែង សម្រាប់ពលរដ្ឋក្នុងស្រុក ជាពិសេសការបណ្តុះបណ្តាលជំនាញបន្ថែម។

គម្រោងសង់រោងចក្រនេះ ត្រូវបានចាប់ផ្តើមសាងសង់នៅខែមករា ឆ្នាំ២០២៤ ឥឡូវនេះបានស្ថិតក្នុងដំណាក់កាលចុងក្រោយហើយ ដោយត្រូវបានគេរំពឹងថានឹងចាប់ផ្តើមផលិតក្នុងពេលឆាប់ៗខាងមុខនេះ។ នៅពេលដែលបើកដំណើរការ រោងចក្រនេះត្រូវបានរំពឹងថានឹងផ្តល់ការងារប្រមាណ ១៥០០កន្លែង សម្រាប់កម្មករក្នុងស្រុក រួមជាមួយនឹងកម្មវិធីបណ្តុះបណ្តាលជំនាញ និងឱកាសសម្រាប់បុគ្គលិកដើម្បីបង្កើនជំនាញរបស់ពួកគេបន្ថែមនៅក្នុងប្រទេសចិន។

នាឱកាសនោះ លោក You Jinbiao បានថ្លែងអំណរគុណចំពោះរាជរដ្ឋាភិបាលកម្ពុជា ដែលដឹកនាំដោយសម្តេចនាយករដ្ឋមន្ត្រី ហ៊ុន ម៉ាណែត និងគ្រប់ក្រសួង ស្ថាប័ន ដែលបានគាំទ្រគម្រោងនេះ ដោយធានាបាននូវដំណើរការរលូន តាំងពីការបើកការដ្ឋានសាងសង់រហូតដល់ជិតបញ្ចប់។ លោកក៏បានបញ្ជាក់ឡើងវិញនូវទំនុកចិត្តរបស់ Wanli Tire ចំពោះបរិយាកាសវិនិយោគនៅកម្ពុជា។

ឯកឧត្តម ស៊ុន ចាន់ថុល បានស្វាគមន៍ចំពោះការអាប់ដេតនេះ ដោយថ្លែងអំណរគុណដល់ក្រុមហ៊ុន Wanli Tire សម្រាប់ទំនុកចិត្ត និងការប្តេជ្ញាចិត្តរបស់ខ្លួន។ ឯកឧត្តម បានសង្កត់ធ្ងន់ថា CDC នឹងបន្តសម្របសម្រួល និងគាំទ្រដល់ការរីកចម្រើនរបស់ក្រុមហ៊ុន ដោយកត់សម្គាល់ថា ការវិនិយោគបែបនេះមិនត្រឹមតែពង្រឹងមូលដ្ឋានឧស្សាហកម្មរបស់កម្ពុជាប៉ុណ្ណោះទេ ប៉ុន្តែថែមទាំងបង្កើតឱកាសដ៏មានអត្ថន័យសម្រាប់ប្រជាពលរដ្ឋកម្ពុជាផងដែរ។

គួររំលឹកថា ក្រុមហ៊ុន Wanli Tire (ខេមបូឌា) បានទទួលជោគជ័យគួរឱ្យកត់សម្គាល់រួចទៅហើយជាមួយនឹងគម្រោងរោងចក្រផលិតសំបកកង់រថយន្តដឹកអ្នកដំណើររបស់ខ្លួននៅក្នុងក្រុងបាវិត ដែលបានរួមចំណែកយ៉ាងធំធេងដល់ការអភិវឌ្ឍន៍សេដ្ឋកិច្ចក្នុងស្រុក។

- Video Advertisement -