សម្ដេច ហ៊ុន សែន៖ ការបូមប្រេងនៅស្ថានីយអប្សរាបន្តដោយរលូន តែចំណូលនៅមិនទាន់ស្ទួយសេដ្ឋកិច្ចនៅឡើយទេ

• Samphors Sao
• 1 ខែ​កុម្ភៈ 2021
• ព័ត៌មានក្នុងស្រុក
• 78 មើល

ចាប់តាំងពីបញ្ចេញប្រេងដំណក់ដំបូងមកកាលពីថ្ងៃទី២៩ ធ្នូ ឆ្នាំ២០២០ កន្លងមកនេះ ការបូមប្រេងនៅស្ថានីយអប្សរានៅតែបន្តដោយរលូន ប៉ុន្តែចំណូលដែលរកបាននៅមិនទាន់ច្រើនដល់ថ្នាក់លើកស្ទួយសេដ្ឋកិច្ចបាននៅឡើយទេ។ នេះបើយោងតាម សម្តេចនាយករដ្ឋមន្រ្តី ហ៊ុន សែន ក្នុងឱកាសបើកការដ្ឋានសាងសង់រោងចក្រទឹកស្អាតនៅបាក់ខែង កាលពីថ្ងៃទី ១ កុម្ភៈ នេះ។ (អានបន្ថែម)

សម្តេចហ៊ុន សែន បានថ្លែងថា តំណក់ប្រេងដំបូងរបស់កម្ពុជាបូមបានរយៈពេល ៣៣ថ្ងៃ ដោយផលិតបាន ៤០,៧៨៨ បារ៉ែល ហើយ ពោលគឺក្នុងមួយថ្ងៃ បូមបានប្រមាណ ១,២៣៦បារ៉ែល។

សម្តេចបន្តថា តាមការវាយតម្លៃកម្ពុជាអាចចម្រាញ់ប្រេងបានចន្លោះពី ៧,០០០ ទៅ ៧,៥០០បារ៉ែលឯណោះក្នុងមួយថ្ងៃ ដូច្នេះចំនួនដែលបូមបានសព្វថ្ងៃនេះ គឺនៅតិចតួចនៅឡើយ តែជាការបោះជំហ៊ានមួយល្អលើវិស័យប្រេងនៅកម្ពុជា។

«ដូច្នេះប្រេងមិនទាន់អាចជះឥទ្ធិពលដល់សេដ្ឋកិច្ចបានទេ នៅក្នុងដំណាក់កាលទី១នេះ ប៉ុន្តែវាជាការចាប់ផ្តើមមួយដ៏ល្អនៃដំណើរការឧស្សាហកម្មប្រេង និងឧស្ម័ននៅកម្ពុជា» សម្ដេច បានបន្ត៕

គួរបញ្ជាក់ផងដែរថា មុននឹងបញ្ចេញដំណក់ដំបូងកាលពីខែធ្នូ គម្រោងនេះ បានយឺតយ៉ាវជាច្រើនសារ។ បើយោងតាមកិច្ចសន្យា ប្រេងតំណក់ដំបូងគួរតែផលិតបានតាំងពីខែមិថុនា ឆ្នាំ២០២០ នេះមកម្ល៉េះ តែដោយសារវិបត្តិកូវីដ រដ្ឋាភិបាលបានពន្យារទៅថ្ងៃទី ៣១ តុលាវិញ។ (អានបន្ថែម)

បន្ទាប់មកទៀត ដោយសារភាពយឺតយ៉ាវនៅតែបន្ត រដ្ឋាភិបាលបានដាក់កំហិតថាបើបូមប្រេងនៅតែមិនបាននៅក្នុងខែធ្នូ ២០២០ នេះទេ រដ្ឋអាចនឹងផ្អាកអាជ្ញាបណ្ណរុករកប្រេងរបស់ក្រុមហ៊ុននេះ ឬផាកជាពិន័យផ្សេងៗថែមទៀតផង។ ហើយក្រោយមកទៀត ក៏សុំពន្យារម្តងទៀតទៅខែមេសា ឆ្នាំ២០២១។

 

• Road and Infrastructure
• Projects Development
• Economy and Finance