ឡាវបានក្លាយជាប្រទេសនាំចេញប្រភពថាមពលធំបំផុតក្នុងតំបន់អាស៊ាន

• Sommana Yan
• 3 ខែ​មេសា 2023
• ព័ត៌មានអន្តរជាតិ
• 104 មើល

ឡាវបាននិងកំពុងក្លាយទៅជាប្រទេសនាំចេញប្រភពថាមពលអគ្គិសនីដ៏ធំមួយនៅក្នុងតំបន់អាស៊ាន ខណៈប្រទេសនេះបាននិងកំពុងលក់អគ្គិសនីទៅកាន់ប្រទេសជិតខាងរបស់ខ្លួនក្នុងទំហំដ៏មហាសាល។

ឆ្នាំ ២០២២ ប្រទេសឡាវរកចំណូលបានជាង ១,៧៦ពាន់លានដុល្លារ ពីការនាំចេញអគ្គិសនី។ ហើយក្នុងឆ្នាំ២០២៣ ប្រទេសឡាវបានកំណត់គោលដៅក្នុងការផលិតអគ្គិសនីឲ្យបានយ៉ាងហោចណាស់ ៥១.១៣៤លានគីឡូវ៉ាត់ម៉ោង (kWh) ដែលអាចផ្ដល់ចំណូលជាង ២,៤ពាន់លានដុល្លារ ហើយមានការកើនឡើងរហូតដល់ ៧១,៧៧ភាគរយ ធៀបនឹងឆ្នាំ២០២២។

បច្ចុប្បន្ននេះ នៅទូទាំងប្រទេសឡាវ មានរោងចក្រថាមពលចំនួន៩០ តែអាចមានសមត្ថភាពផលិតសរុបបានចំនួន ១.១០០០មេហ្កាវ៉ាត់។ ក្នុងនោះ រួមមាន វារីអគ្គិសនីចំនួន៧៧ អគ្គិសនីដើរដោយពន្លឺព្រះអាទិត្យចំនួន៨ រោងចក្រថាមពលជីវៈចម្រុះ៤ និងរោងចក្រថាមពលធ្យូងថ្មចំនួន១។

បច្ចុប្បន្ននេះ ឡាវកំពុងធ្វើពាណិជ្ជកម្មលក់អគ្គិសនីទៅឲ្យប្រទេសមួយចំនួនដូចជា ថៃ វៀតណាម កម្ពុជា សិង្ហបុរី និងប្រទេសចិន ជាដើម ដែលធ្វើឱ្យការនាំចេញអគ្គិសនីរបស់ឡាវត្រូវបានចាត់ទុកថាជាចំណែកនៅក្នុង “គំនិតផ្ដួចផ្ដើមបែងចែកថាមពលរបស់អាស៊ាន” (ASEAN Power Grid Initiation “។

ជាក់ស្ដែង ប្រទេសវៀតណាមបានក្លាយទៅជាអ្នកវិនិយោគគម្រោងអគ្គិសនីធំបំផុតលំដាប់ទីបី នៅក្នុងប្រទេសឡាវក្រោមទុនជាង ៥,៣ពាន់លានដុល្លារ។ ជាមួយគ្នានេះ ប្រទេសឡាវក៏បានលក់អគ្គិសនីទៅឲ្យប្រទេសសិង្ហបុរីចំនួន ១០០មេហ្កាវ៉ាត់ (MW) តាមបណ្ដាញបញ្ជូនថាមពលឆ្លងកាត់ប្រទេសថៃ និងម៉ាឡេស៊ីផងដែរ៕

រូបភាពដោយ៖ Bangkok Post

• Energy and Environment