ឥណ្ឌូនេស៊ីគ្រោងបើកដំណើរការរថភ្លើង​​លឿនដំបូងបង្អស់តម្លៃជាង $៧ពាន់លាន នៅខែ៨-២០២៣

• Sommana Yan
• 14 ខែ​មេសា 2023
• ព័ត៌មានអន្តរជាតិ
• 80 មើល

ឥណ្ឌូនេស៊ី គ្រោងបើកដំណើរការ​រថភ្លើង​ល្បឿន​លឿនទី១ និងដំបូងបង្អស់របស់ខ្លួន តម្លៃប្រមាណ ៧,២ពាន់លានដុល្លារ នៅក្នុងខែសីហា ឆ្នាំ២០២៣ខាងមុខនេះ ដែលជាថ្ងៃខួបឯករាជ្យរបស់ប្រទេសផងដែរ។

នេះបើយោងតាមការបញ្ជាក់របស់មន្ត្រីជាន់ខ្ពស់មួយរូប នៅក្នុងខុទ្ទកាល័យរបស់លោកប្រធានាធិបតីចូកូវីដូដូ ដោយបានគូសបញ្ជាក់ថា នៅទីបំផុត គម្រោងដ៏ធំនេះបានសម្រេចជោគជ័យហើយ ក្រោយពន្យារពេលជាច្រើនលើកច្រើនសាមកហើយ។

លោក Luhut Panjaitan រដ្ឋមន្ត្រីសម្របសម្រួលកិច្ចការសមុទ្រ និងវិនិយោគរបស់ប្រទេសឥណ្ឌូនេស៊ី បាននិយាយថា រហូតមកទល់នឹងពេលនេះ គម្រោងផ្លូវរថភ្លើងល្បឿនលឿន Jakarta-Bandung ដែលជាផ្នែកដ៏សំខាន់នៃគំនិតផ្តួចផ្តើមខ្សែក្រវាត់ និងផ្លូវ (BRI) របស់ប្រទេសចិននេះ ស្ទើតែបញ្ចាប់ការងារសាងសង់ទាំងស្រុងហើយ។

គម្រោងរថភ្លើងនេះនឹងចាប់ផ្តើមដំណើរការសាកល្បងយូរបំផុតត្រឹមចុងខែឧសភាខាងមុខនេះ និងត្រៀមរួចរាល់​ ដោយរំពឹងថានឹងចាប់ផ្តើមដំណើរការជាផ្លូវការនៅថ្ងៃទី១៨ ខែសីហា ឆ្នាំ២០២៣ ដែលជាខួបលើកទី ៧៨ នៃឯករាជ្យរបស់ប្រទេសឥណ្ឌូនេស៊ី។ នេះបើយោងតាមការសែត The Diplomat បានសម្រង់សម្តីរបស់លោក Luhut Panjaitan។

ផ្លូវរថភ្លើងល្បឿនលឿន Jakarta-Bandung មានប្រវែងសរុបចំនួន ១៤២គីឡូម៉ែត្រ និងកំពុងត្រូវបានសាងសង់ដោយក្រុមហ៊ុនឥណ្ឌូណេស៊ី-ចិន PT Kereta Cepat Indonesia China (KCIC) ជាគម្រោងដែលតភ្ជាប់រដ្ឋធានីហ្សាការតា ទៅកាន់ទីក្រុង Bandung។​

ក្រោយបើកដំណើរការ គម្រោងនេះនឹងកាត់បន្ថយការធ្វើដំណើរបានរយៈពេលរហូតដល់ទៅបីម៉ោង ឱ្យមកសល់ត្រឹមតែប្រហែល ៤០នាទីប៉ុណ្ណោះ៕

• Road and Infrastructure
• Projects Development