សម្តេចតេជោ ហ៊ុន សែន ជំរុញឱ្យរាជរដ្ឋាភិបាលពន្លឿនការចេញបណ្ណកម្មសិទ្ធិដីធ្លី ដើម្បីឆ្លើយតបនឹងតម្រូវការរបស់ប្រជាពលរដ្ឋ

Proeksa Meas
29 ខែឧសភា 2026
ព័ត៌មានអចលនទ្រព្យ
401 មើល

ប្រមុខរដ្ឋស្តីទីស្នើឱ្យដាក់ការផ្តល់បណ្ណដីធ្លីជាសេវាចាំបាច់ ខណៈក្រសួងពាក់ព័ន្ធបើកកិច្ចប្រជុំអន្តរក្រសួងដើម្បីដាក់ចេញវិធានការបន្ថែម

ដើម្បីដោះស្រាយបញ្ហាយឺតយ៉ាវផ្នែករដ្ឋបាលដែលបង្កឱ្យមានភាពថ្នាំងថ្នាក់ក្នុងចំណោមប្រជាពលរដ្ឋ សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានបន្តលើកឡើង និងជំរុញដល់រាជរដ្ឋាភិបាលក្នុងការបន្តយកចិត្តទុកដាក់ពន្លឿនការធ្វើបណ្ណកម្មសិទ្ធិដីធ្លីជូនប្រជាពលរដ្ឋនៅទូទាំងប្រទេស រួមទាំងនៅក្នុងរាជធានីភ្នំពេញផងដែរ។ នៅក្នុងឱកាសសំណេះសំណាលជាមួយថ្នាក់ដឹកនាំព្រឹទ្ធសភា រដ្ឋសភា រាជរដ្ឋាភិបាល ក្រសួង និងក្រុមប្រឹក្សារាជធានី ខណ្ឌ សង្កាត់ ព្រមទាំងប្រធានមន្ទីរ និងអង្គភាពនានាសរុបជាងបួនពាន់នាក់ កាលពីព្រឹកថ្ងៃអាទិត្យ ទី២៤ ខែឧសភា ឆ្នាំ២០២៦ នេះ សម្តេចតេជោ ហ៊ុន សែន បានគូសបញ្ជាក់ពីបញ្ហាប្រឈមមួយចំនួនដែលប្រជាពលរដ្ឋបានជួបប្រទះពាក់ព័ន្ធនឹងការធ្វើបណ្ណកម្មសិទ្ធិដីធ្លីនាពេលកន្លងមក។

នៅក្នុងកិច្ចប្រជុំនោះ សម្តេចតេជោ បានស្នើដោយផ្ទាល់ទៅកាន់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ឱ្យបន្តរុញច្រានការងារនេះឱ្យកាន់តែមានសន្ទុះលឿនជាងមុន។ ជាមួយគ្នានេះ សម្តេចតេជោ ក៏បានស្នើឱ្យមានការដាក់បញ្ចូលសេវាផ្តល់បណ្ណកម្មសិទ្ធិដីធ្លីទៅជាសេវាចាំបាច់ ដើម្បីកាត់បន្ថយនីតិវិធីរដ្ឋបាលស្មុគស្មាញ និងធានាបាននូវការផ្តល់សេវាជូនប្រជាពលរដ្ឋបានទាន់ពេលវេលា។ ទោះជាយ៉ាងណាក៏ដោយ សម្តេចតេជោ ប្រមុខរដ្ឋស្តីទី ក៏បានសម្តែងនូវការកោតសរសើរយ៉ាងស្មោះស្ម័គ្រចំពោះរាជរដ្ឋាភិបាល និងក្រសួងរៀបចំដែនដី នគរូបនីយកម្ម និងសំណង់ ដែលបានខិតខំប្រឹងប្រែងយ៉ាងខ្លាំងក្នុងការចេញបណ្ណកម្មសិទ្ធិជូនប្រជាពលរដ្ឋ។ លោកបានមានប្រសាសន៍រំឭកថា នៅពេលចាប់ផ្តើមអាណត្តិទី៧ មានបណ្ណកម្មសិទ្ធិដីធ្លីប្រមាណជា ៤លានបណ្ណដែលមិនទាន់បានចេញ តែឆ្លងកាត់រយៈពេលជាងពីរឆ្នាំមកនេះ បណ្ណជាង ៣លានសន្លឹកហើយត្រូវបានដំណើរការ និងចែកជូនដល់ដៃប្រជាពលរដ្ឋដោយជោគជ័យ។

ជាការឆ្លើយតបភ្លាមៗទៅនឹងការណែនាំដ៏ខ្ពង់ខ្ពស់នេះ នាថ្ងៃទី ២៦ ខែឧសភា ឆ្នាំ២០២៦ ក្រសួងរៀបចំដែនដី នគរូបនីយកម្ម និងសំណង់ បានរៀបចំកិច្ចប្រជុំអន្ដរក្រសួងមួយដើម្បីពិភាក្សាលើការផ្តល់សេវាសាធារណៈជូនប្រជាជន។ កិច្ចប្រជុំនេះបានប្រព្រឹត្តទៅដោយមានការចូលរួមពីតំណាងក្រសួងមហាផ្ទៃ ក្រសួងសេដ្ឋកិច្ចនិងហិរញ្ញវត្ថុ និងរដ្ឋបាលថ្នាក់ក្រោមជាតិ ដើម្បីដាក់ចេញនូវវិធានការបន្ថែមសំដៅជំរុញពន្លឿនការរៀបចំឯកសារ និងការចេញបណ្ណកម្មសិទ្ធិជូនប្រជាពលរដ្ឋឱ្យកាន់តែមានប្រសិទ្ធភាព ។ ទោះបីជាយ៉ាងណាក៏ដោយ នៅក្នុងកិច្ចប្រជុំអន្តរក្រសួងនេះ មិនទាន់បានលម្អិតអំពីផែនការសកម្មភាព ពេលវេលា គោលដៅ និងវិសាលភាពជាក់លាក់នៃការងារនោះនៅឡើយទេ។