តើមានអ្វីថ្មីក្នុង iTwin Engage?​ ជួយម្ចាស់គម្រោងពង្រឹងការគ្រប់គ្រងសំណង់ដូចម្ដេច?

• Proeksa Meas
• 27 ខែ​សីហា 2026
• ព័ត៌មានសំណង់
• 160 មើល

ក្រុមហ៊ុន Bentley Systems កំពុងជួយក្រុមហ៊ុនសំណង់ជាច្រើនក្នុងការពង្រឹងការគ្រប់គ្រងគម្រោងសំណង់ឱ្យកាន់តែមានប្រសិទ្ធភាព និងមានល្បឿនលឿនជាងមុន តាមរយៈកម្មវិធី iTwin Engage។

iTwin Engage គឺវេទិកាសម្រាប់បង្ហាញទិន្នន័យគម្រោងជារូបភាពអន្តរកម្ម (immersive visualization) ក្នុងពេលជាក់ស្តែង។ កម្មវិធីនេះរួមបញ្ចូលទិន្នន័យពី Digital Twin, ម៉ូឌែល BIM, Reality Data, គំរូវិស្វកម្ម និងកាលវិភាគសំណង់ 4D ទៅក្នុង Digital Twin តែមួយ ដែលមានការធ្វើបច្ចុប្បន្នភាពជាបន្តបន្ទាប់ ដើម្បីផ្តល់ភាពយល់ដឹងកាន់តែច្បាស់អំពីគម្រោងដែលមានភាពស្មុគស្មាញ។

តាមរយៈការប្រើកម្មវិធីនេះ អ្នកពាក់ព័ន្ធអាចស្វែងយល់អំពីការរចនាគម្រោង ប្រៀបធៀបជម្រើសផ្សេងៗ មើលលំដាប់ដំណើរការសាងសង់ និងវាយតម្លៃផលប៉ះពាល់ទៅលើប្រតិបត្តិការ និងសហគមន៍ជុំវិញបានក្នុងពេលជាក់ស្តែង ជាជាងការប្រើរបាយការណ៍បែបធម្មតាដែលដាច់ដោយឡែកពីគ្នា។

ការមើលឃើញ និងគ្រប់គ្រងគម្រោងដោយអាចមើលឃើញរូបភាពជាក់ស្ដែងដូចពិតនេះ ជួយពន្លឿនការអនុម័តគម្រោង កាត់បន្ថយការយល់ច្រឡំ និងការងារកែសម្រួលឡើងវិញ ព្រមទាំងគាំទ្រការអនុវត្តគម្រោងឱ្យកាន់តែមានប្រសិទ្ធភាព និងនិរន្តរភាព។

Bentley បានឱ្យដឹងថា អង្គភាពដែលប្រើប្រាស់ Digital Twin ដែលមានទិន្នន័យភ្ជាប់គ្នា និងការបង្ហាញទិន្នន័យជារូបភាពអន្តរកម្ម អាចបង្កើនកិច្ចសហការរវាងក្រុមបច្ចេកទេស ថ្នាក់ដឹកនាំ ម្ចាស់គម្រោង និងសហគមន៍ ដែលជួយឱ្យការសម្រេចចិត្តលើគម្រោងហេដ្ឋារចនាសម្ព័ន្ធមានល្បឿនលឿន និងប្រកបដោយទំនុកចិត្តនៅគ្រប់ដំណាក់កាលនៃវដ្តជីវិតគម្រោង។

ឧទាហរណ៍ដ៏សំខាន់មួយគឺ​គម្រោងរបស់នាយកដ្ឋានដឹកជញ្ជូននៅប្រទេសអាមេរិក។ គម្រោងកំពុងប្រឈមនឹងការសម្រេចចិត្តលើការកែប្រែគម្រោងផ្លូវបំបែកកម្រិតខ្ពស់ដ៏ស្មុគស្មាញ ដែលមានតម្លៃរហូតដល់រាប់រយលានដុល្លារ។

ភស្តុតាងដែលមានគឺរបាយការណ៍ប្រវែង ៥០០ទំព័រ និងរូបភាពគំរូ 3D មួយចំនួនដែលហួសសម័យ។ ទោះបីជាក្រុមការងារបានពន្យល់អំពីគម្រោងយ៉ាងក៏ដោយ អ្នកស្ដាប់ដែលពាក់ព័ន្ធនឹងគម្រោង នៅតែពិបាកស្រមៃអំពីផលប៉ះពាល់ទៅលើលំហូរចរាចរណ៍ អចលនទ្រព្យនៅជាប់តំបន់គម្រោង និងបញ្ហានានា។

ដោយមិនអាចមើលឃើញការរចនាក្នុងបរិបទជាក់ស្តែង ការសម្រេចចិត្តប្រកបដោយទំនុកចិត្តក្លាយជារឿងស្ទើរតែមិនអាចទៅរួច។ ប៉ុន្តែក្រោយងាកមកប្រើកម្មវិធី​ Bentley គ្រប់យ៉ាងអាចពន្យល់បានយ៉ាងងាយ ហើយការសម្រេចចិត្តក៏លឿនជាងមុន។

• បច្ចេកវិទ្យា និងវិស្វកម្ម
• iTwin Engage
• Digital Twin
• Bentley Systems
• BIM