ឆ្នាំ២០២៥៖ ពាណិជ្ជកម្មកម្ពុជា-អាម៉េរិក សម្រេចបានប្រមាណ ១៣ ប៊ីលានដុល្លារ

Proeksa Meas
2 ខែសីហា 2026
ព័ត៌មានអចលនទ្រព្យ
70 មើល

រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ អូន ព័ន្ធមុនីរ័ត្ន និងលោក Brian McFeeters ប្រធានក្រុមប្រឹក្សាពាណិជ្ជកម្មអាមេរិក-អាស៊ាន បញ្ជាក់ជាថ្មីអំពីការប្តេជ្ញាចិត្តក្នុងការជំរុញកំណើនវិស័យឯកជនដែលមានតម្លៃខ្ពស់សម្រាប់ឧស្សាហកម្មសំខាន់ៗ

នៅក្នុង ឆ្នាំ២០២៥ ទំហំពាណិជ្ជកម្មកម្ពុជា-អាម៉េរិក សម្រេចបានប្រមាណ ១៣ប៊ីលានដុល្លារ ខណៈភាគីទាំងពីរ ក៏បានប្តេជ្ញាជំរុញកិច្ចសហប្រតិបត្តិការលើការធ្វើធុរកិច្ច ពាណិជ្ជកម្ម វិនិយោគទ្វេភាគីបន្ថែមទៀតផងដែ។ នេះបើតាមសេចក្តីប្រកាសព័ត៌មានស្តីពីជំនួប ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយឯកអគ្គរដ្ឋទូត Brian D. McFeeters ប្រធាន និងជានាយកប្រតិបត្តិ នៃក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន (US-ASEAN Business Council) ផ្សាយចេញកាលថ្ងៃទី២៤ ខែកក្កដា ឆ្នាំ២០២៦។

នាឱកាសនោះ ឯកឧត្តម អូន ព័ន្ធមុនីរ័ត្ន វាយតម្លៃខ្ពស់ចំពោះកិច្ចសហប្រតិបត្តិការរវាង កម្ពុជា និងអាម៉េរិក ក្នុងការបន្តពង្រឹងទំនាក់ទំនងពាណិជ្ជកម្ម និងការបន្តវិនិយោគរបស់ក្រុមហ៊ុនពហុជាតិអាម៉េរិកជាច្រើននៅកម្ពុជា។ ជាក់ស្តែង ឯកឧត្តមថា ក្នុងឆ្នាំ ២០២៥ នេះ ទំហំពាណិជ្ជកម្មសរុបរវាងកម្ពុជា និងអាម៉េរិក សម្រេចបានប្រមាណ ១៣ ប៊ីលានដុល្លារអាម៉េរិក ខណៈទុនវិនិយោគពីអាម៉េរិកបាន កើនដល់ប្រមាណ ១ប៊ីលានដុល្លារអាម៉េរិក ដែលឆ្លុះបញ្ចាំពីភាពរឹងមាំនៃចំណងមិត្តភាពសេដ្ឋកិច្ច ពាណិជ្ជកម្ម រួមចំណែកក្នុងកិច្ចគ្រប់គ្រងស្ថិរភាពម៉ាក្រូសេដ្ឋកិច្ច និងការរក្សាបាននូវចីរភាពហិរញ្ញវត្ថុសាធារណៈរបស់កម្ពុជា សម្រាប់រយៈពេលមធ្យមទៅវែង។

ជាមួយគ្នានេះ ឯកអគ្គរដ្ឋទូត បានសន្យាពាំនាំនូវព័ត៌មានពីបរិយាកាសធុរកិច្ចនៅកម្ពុជា ទៅបន្តផ្សព្វផ្សាយនៅទីក្រុងវ៉ាស៊ីនតោន សហរដ្ឋអាម៉េរិក ដើម្បីទាក់ទាញវិនិយោគ និងធុរកិច្ចពីសហ រដ្ឋអាម៉េរិក ព្រមទាំងរឹតចំណងមិត្តភាពសេដ្ឋកិច្ច និងពាណិជ្ជកម្មរវាងប្រទេសទាំងពីរឱ្យកាន់តែជិតស្និទ្ធបន្ថែមទៀត។

តាមរយៈជំនួបនោះ រដ្ឋមន្ត្រីក្រសួងសេដ្ឋកិច្ច ក៏បើកទ្វារស្វាគមន៍រាល់ការវិនិយោគនៅកម្ពុជាពីវិនិយោគិនអាមេរិក ចំពោះវិស័យអាទិភាព និងមានសក្តានុពលខ្ពស់ រួមមានវិស័យកសិ-ឧស្សាហកម្ម ថាមពលស្អាត ឌីជីថល ព័ស្តុភារកម្ម សុខាភិបាល អប់រំ និងបច្ចេកវិទ្យាទំនើប ជាដើមផងដរ៕ (អានបន្ថែម)