កម្ពុជា-ជប៉ុន ពិនិត្យលទ្ធភាពបង្កើតកិច្ចសហការក្នុងវិស័យបញ្ជូនថាមពលអគ្គិសនី និងថាមពលកកើតឡើងវិញ

Proeksa Meas
12 ខែវិច្ឆិកា 2026
ព័ត៌មានសំណង់
38 មើល

ក្រសួងការងារនិងបណ្តុះបណ្តាលវិជ្ជាជីវៈ និងក្រុមហ៊ុនជប៉ុន TOKO ពិនិត្យលទ្ធភាពបង្កើតកិច្ចសហការក្នុងវិស័យបញ្ជូនថាមពលអគ្គិសនី និងថាមពលកកើតឡើងវិញនៅកម្ពុជា ដើម្បីបើកទំព័រថ្មីបង្កើតភាពជាដៃគូ។ នេះបើយោងតាមជំនួបពិភាក្សារវាង ឯកឧត្តម ហេង សួរ រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ ជាមួយលោក Kengo Ichinoki មន្ត្រីប្រតិបត្តិជាន់ខ្ពស់ និងជាប្រធានផ្នែកអាជីវកម្មក្រៅប្រទេសនៃក្រុមហ៊ុន TOKO Electrical Construction Co., Ltd. កាលថ្ងៃទី៣ ខែវិច្ឆិកា ឆ្នាំ២០២៦។

នាឱកាសនោះ ឯកឧត្តម ហេង សួរ បានឱ្យដឹងថា ជំនួបនេះធ្វើឡើងដើម្បីបើកទំព័រថ្មីបង្កើតភាពជាដៃគូ ពង្រីកឱកាសការងារ និងបណ្តុះបណ្តាលជំនាញវិជ្ជាជីវៈដល់យុវជនកម្ពុជា។ លើសពីនេះ ជំនួបនេះក៏បង្ហាញពីអាជីវកម្មក្នុងតំបន់ និងសកម្មភាពរបស់ក្រុមហ៊ុននៅកម្ពុជា ជាពិសេសការជ្រើសរើសបុគ្គលិកជំនាញបច្ចេកទេសវិស្វករ និងពលករជំនាញ ព្រមទាំងពិនិត្យលទ្ធភាពបង្កើតកិច្ចសហការក្នុងវិស័យបញ្ជូនថាមពលអគ្គិសនី និងថាមពលកកើតឡើងវិញនៅកម្ពុជា។

ជាមួយគ្នានេះ លោក Kengo Ichinoki ក៏លើកឡើងថា ក្រុមហ៊ុនជប៉ុនពេញចិត្តចំពោះកម្លាំងពលកម្មវ័យក្មេងប្រកបដោយសក្តានុពលរបស់កម្ពុជា ហើយក៏មានផែនការបន្តជ្រើសរើសវិស្វករ និងកម្មករជំនាញកម្ពុជាជារៀងរាល់ឆ្នាំ ជាពិសេសយុវជនដែលមានចំណាប់អារម្មណ៍ទៅធ្វើការនៅជប៉ុន។ លើសពីនេះ ក្រុមហ៊ុនក៏នឹងជួយណែនាំក្រុមហ៊ុនដៃគូរបស់ខ្លួនទាំងជាង ២០០ឱ្យជួយផ្តល់ឱកាសការងារដល់យុវជនកម្ពុជាផងដែរ។

សូមជម្រាបដែរថា នៅក្នុងជំនួបនោះ ភាគីទាំងពីរក៏ផ្លាស់ប្តូរយោបល់ដើម្បីស្វែងយល់បន្ថែមពីបច្ចេកទេស និងបទពិសោធជោគជ័យរបស់ក្រុមហ៊ុន TOKO ក្នុងរយៈពេលជាងមួយសតវត្សរ៍កន្លងមក ព្រមទាំងពិនិត្យលទ្ធភាពក្នុងការបង្កើត និងពង្រឹងកិច្ចសហប្រតិបត្តិការជាមួយក្រសួងពាក់ព័ន្ធនឹងវិស័យទេសន្តរប្រវេសន៍ការងារ និងបណ្តុះបណ្តាលបច្ចេកទេសនិងវិជ្ជាជីវៈសម្រាប់វិស័យវិស្វកម្មអគ្គិសនី និងហេដ្ឋារចនាសម្ព័ន្ធថាមពល៕ (អានបន្ថែម)