កម្ពុជា-ចិន ផ្លាស់ប្តូរបទពិសោធន៍លើវិស័យដឹកជញ្ជូនឆ្លាតវៃ និងបច្ចេកវិទ្យាទំនើបគ្រប់គ្រងប្រព័ន្ធដឹកជញ្ជូន

Proeksa Meas
2 ខែវិច្ឆិកា 2026
ព័ត៌មានសំណង់
62 មើល

ក្រសួងសាធារណការ និងដឹកជញ្ជូនកម្ពុជា កាលថ្ងៃទី២៦ ខែតុលា ដល់ថ្ងៃទី៨ ខែវិច្ឆិកា ឆ្នាំ២០២៦ បានបញ្ជូនគណៈប្រតិភូ និងមន្ត្រីបច្ចេកទេស ចំនួន ២៥រូប ទៅចូលរួមវគ្គបណ្តុះបណ្តាលកម្រិតខ្ពស់ ស្តីពីកិច្ចសហប្រតិបត្តិការកម្ពុជា-ចិន ដើម្បីស្វែងយល់ និងផ្លាស់ប្តូរបទពិសោធន៍លើវិស័យដឹកជញ្ជូនឆ្លាតវៃ និងបច្ចេកវិទ្យាទំនើបគ្រប់គ្រងប្រព័ន្ធដឹកជញ្ជូន។

ក្រសួងសាធារណការ បានឱ្យដឹងថា វគ្គបណ្តុះបណ្តាលនេះមានគោលបំណងលើកកម្ពស់ចំណេះដឹង ជំនាញបច្ចេកទេស និងការផ្លាស់ប្តូរបទពិសោធន៍រវាងកម្ពុជា និងចិន លើវិស័យដឹកជញ្ជូនឆ្លាតវៃ និងការអភិវឌ្ឍប្រកបដោយចីរភាព ព្រមទាំងស្វែងយល់ពីការអនុវត្តបច្ចេកវិទ្យាទំនើបក្នុងការគ្រប់គ្រងប្រព័ន្ធដឹកជញ្ជូន ការអភិវឌ្ឍហេដ្ឋារចនាសម្ព័ន្ធ និងការប្រើប្រាស់បច្ចេកវិទ្យាឌីជីថល ដើម្បីបង្កើនប្រសិទ្ធភាព សុវត្ថិភាព និងនិរន្តរភាពនៃវិស័យដឹកជញ្ជូន និងហេដ្ឋារចនាសម្ព័ន្ធប្រកបដោយប្រសិទ្ធភាព និងចីរភាព។

នាឱកាសនោះ តំណាងគណៈប្រតិភូក្រសួងសាធារណការ បានបង្ហាញនូវជំនឿជឿជាក់ថា ចំណេះដឹង និងជំនាញដែលទទួលបានពីវគ្គបណ្តុះបណ្តាលនេះ នឹងត្រូវបានយកទៅអនុវត្តក្នុងការបំពេញការងារជាក់ស្តែង ដើម្បីចូលរួមជំរុញការធ្វើទំនើបកម្មវិស័យដឹកជញ្ជូននៅកម្ពុជា។

សូមជម្រាបដែរថា វគ្គបណ្តុះបណ្តាលនេះ ក៏ជាការរួមចំណែកពង្រឹងចំណងមិត្តភាព និងកិច្ចសហប្រតិបត្តិការរវាងកម្ពុជា និងចិន ជាពិសេសក្នុងការអភិវឌ្ឍប្រព័ន្ធដឹកជញ្ជូនឆ្លាតវៃ និងហេដ្ឋារចនាសម្ព័ន្ធប្រកបដោយចីរភាព ដើម្បីគាំទ្រដល់កំណើនសេដ្ឋកិច្ច និងការអភិវឌ្ឍសង្គមរបស់ប្រទេសទាំងពីរ៕ (អានបន្ថែម)