កម្ពុជា-ជប៉ុន ចុះអនុស្សរណៈនៃការយោគយល់រួមគ្នាជំរុញកិច្ចសហប្រតិបត្តិការវិនិយោគទ្វេភាគី

Proeksa Meas
20 ខែមិថុនា 2026
ព័ត៌មានអចលនទ្រព្យ
625 មើល

ក្រុមប្រឹក្សាអភិវឌ្ឍន៍កម្ពុជា និងក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន (METI) បានសម្រេចចុះអនុស្សរណៈនៃការយោគយល់ (MoU) រួមគ្នាមួយ ដើម្បីជំរុញកិច្ចសហប្រតិបត្តិការវិនិយោគទ្វេភាគីឱ្យកាន់តែប្រសើរឡើងថែមទៀត។ នេះបើយោងតាមជំនួបពិភាក្សារវាងឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) ជាមួយ ឯកឧត្តម KOMORI Takuo អនុរដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន (METI) កាលពីថ្ងៃទី៩ ខែមិថុនា ឆ្នាំ២០២៦ នៅទីក្រុងតូក្យូ។

នៅក្នុងជំនួបនោះ បានឱ្យដឹងថា កាលពីថ្ងៃទី២៩ ខែឧសភា កន្លងទៅ ក្រុមប្រឹក្សាអភិវឌ្ឍន៍កម្ពុជា និងក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន បានចុះអនុស្សរណៈលើកិច្ចសហប្រតិបត្តិការស្តីពី កិច្ចសហប្រតិបត្តិការវិនិយោគ ដែលមានគោលបំណងសំខាន់ៗចំនួន៣ រួមមាន៖ ១. ការលើកកម្ពស់សកម្មភាពជំរុញការវិនិយោគ ២. ការសម្របសម្រួលកិច្ចការវិនិយោគ និង ៣. ការបង្កើតក្រុមការងារសហបង្កើតធុរកិច្ច (Business Co-creation Team).

នៅក្នុងជំនួបពិភាក្សាការងារទ្វេភាគីខាងលើនេះដែរ ភាគីទាំងពីរអះអាងថា ក្នុងគោលបំណងពង្រឹងយន្តការ និងពង្រីកកិច្ចសហប្រតិបត្តិការលើវិស័យពាណិជ្ជកម្ម វិនិយោគ តាមរយៈយន្តការដែលមានស្រាប់ ដូចជាការបង្កើតក្រុមការងារសហបង្កើតធុរកិច្ច (BCT) និងការអភិវឌ្ឍវិស័យឧស្សាហកម្មរវាងប្រទេសទាំងពីរ ឱ្យឈានឡើងខ្ពស់ថែមមួយកម្រិតទៀត។

ជំនួបនោះ ក៏ជាសក្ខីភាពមួយឆ្លុះបញ្ចាំងពីចំណងដ៏រឹងមាំនៃទំនាក់ទំនងការទូតសេដ្ឋកិច្ចរបស់កម្ពុជា ក្នុងកម្រិតរដ្ឋាភិបាលនិងរដ្ឋាភិបាល (G2G) ដើម្បីធានាបាននូវលំហូរវិនិយោគប្រកបដោយគុណភាព សំដៅជំរុញសេដ្ឋកិច្ចជាតិឱ្យកាន់តែមានភាពធន់ផងដែរ៕