កម្ពុជា-ម៉ាឡេស៊ី ឯកភាពបង្កើនកិច្ចសហប្រតិបត្តិការលើវិស័យព័ស្តុភារកម្ម និងថាមពលកកើតឡើងវិញ

Proeksa Meas
13 ខែសីហា 2026
ព័ត៌មានអចលនទ្រព្យ
470 មើល

លទ្ធផលពីគណៈកម្មការចម្រុះលើកទី៣ ផ្តោតសំខាន់កិច្ចសហប្រតិបត្តិការទ្វេភាគី នូវគំនិតផ្តួចផ្តើមពង្រីកទំនាក់ទំនងពាណិជ្ជកម្ម ការធ្វើសមាហរណកម្មថាមពលឆ្លងដែន និងការផ្លាស់ប្ដូរកសិកម្មចម្រុះ

កម្ពុជា-ម៉ាឡេស៊ី ឯកភាពបង្កើនកិច្ចសហប្រតិបត្តិការលើវិស័យជាច្រើន ដោយក្នុងនោះមានវិស័យព័ស្តុភារកម្ម និងថាមពលកកើតឡើងវិញ សំដៅឈានទៅជំរុញពាណិជ្ជកម្ម និងវិនិយោគទ្វេភាគីបន្ថែមទៀត។ នេះបើតាមសេចក្តីប្រកាសព័ត៌មានស្តីលទ្ធផលនៃកិច្ចប្រជុំគណៈកម្មការចម្រុះស្តីពីកិច្ចសហប្រតិបត្តិការទ្វេភាគី លើកទី៣ រវាងកម្ពុជា និងម៉ាឡេស៊ី នៅម៉ាឡេស៊ី ដែលបានចេញផ្សាយកាលពីថ្ងៃទី៤ ខែសីហា ឆ្នាំ២០២៦។

សេចក្តីប្រកាសព័ត៌មាន បានឱ្យដឹងថា ពាណិជ្ជកម្ម និងវិនិយោគ ជាសសរស្តម្ភដ៏សំខាន់មួយនៃកិច្ចសហប្រតិបត្តិការសេដ្ឋកិច្ចរវាងកម្ពុជា និងម៉ាឡេស៊ី។ ថ្នាក់ដឹកនាំទាំងពីរប្រទេសបានសារទរចំពោះការកើនឡើងនៃទំហំពាណិជ្ជកម្ម និងបានឯកភាពបង្កើនកិច្ចសហប្រតិបត្តិការលើវិស័យផលិតកម្ម ការកែច្នៃអាហារ ភស្តុភារកម្ម សេដ្ឋកិច្ច ឌីជីថល ថាមពលកកើតឡើងវិញ ជំរុញកិច្ចសហប្រតិបត្តិការថាមពលឆ្លងដែន និងរៀបចំព្រឹត្តិការណ៍នានា រួមមានវេទិកាពាណិជ្ជកម្ម និងវិនិយោគ ពិព័រណ៍ពាណិជ្ជកម្ម និងការផ្គូរផ្គងធុរកិច្ច។

បន្ថែមពីនេះ កម្ពុជា-ម៉ាឡេស៊ី ក៏បានវាយតម្លៃខ្ពស់ចំពោះភាពរីកចម្រើននៃទំនាក់ទំនងរវាងកម្ពុជា និងម៉ាឡេស៊ីលើគ្រប់វិស័យ។ ជាមួយគ្នានេះ កម្ពុជានិងម៉ាឡេស៊ី ក៏បានឯកភាពពង្រីកកិច្ចសហប្រតិបត្តិការលើវិស័យកសិកម្ម ក្នុងគោលបំណង បំពេញបន្ថែមឱ្យគ្នាទៅវិញទៅមក។ ក្រៅពីពាណិជ្ជកម្មអង្ករ ប្រទេសទាំងពីរ ក៏បានឯកភាពពង្រីកការផ្លាស់ប្តូរពាណិជ្ជកម្មទៅលើកសិផលផ្សេងទៀត ដូចជាគ្រាប់ស្វាយចន្ទី វារីវប្បកម្ម និងជីកសិកម្មផងដែរ៕ (អានបន្ថែម)

- Video Advertisement -