CDC និងសភាពាណិជ្ជកម្មអឺរ៉ុប រួមគ្នាធ្វើឱ្យប្រសើរឡើងនូវនីតិវិធីរដ្ឋបាលពាក់ព័ន្ធនឹងធុរកិច្ចកម្ពុជា

• Proeksa Meas
• 19 ខែ​តុលា 2026
• ព័ត៌មានអចលនទ្រព្យ
• 45 មើល

ក្រុមប្រឹក្សាអភិវឌ្ឍន៍កម្ពុជា (CDC) និងសភាពាណិជ្ជកម្មអឺរ៉ុប (EuroCham) កាលពីថ្ងៃទី៨ ខែតុលា ឆ្នាំ២០២៦ បានរៀបចំពិធីទទួលទានអាហារពេលព្រឹកធុរកិច្ច លើកទី៤ រវាងស្ថាប័នរដ្ឋនិងវិស័យឯកជន ដើម្បីរួមគ្នាធ្វើឱ្យប្រសើរឡើងនូវនីតិវិធីរដ្ឋបាលពាក់ព័ន្ធនឹងការធ្វើធុរកិច្ចកម្ពុជា។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានឱ្យដឹងថា ពិធីខាងលើនេះរៀបចំឡើងក្នុងគោលបំណងពិភាក្សាផ្លាស់ប្តូរយោបល់អំពីការធ្វើឱ្យប្រសើរឡើងនូវនីតិវិធីរដ្ឋបាលពាក់ព័ន្ធនឹងធុរកិច្ច និងការផ្តល់សេវាថែទាំ និងគាំទ្រការវិនិយោគយ៉ាងជិតស្និទ្ធ ដើម្បីធានាបាននូវការជឿទុកចិត្តរបស់វិនិយោគិនបរទេសនៅកម្ពុជា។

ឯកឧត្តម ស៊ុន ចាន់ថុល បានបញ្ជាក់ពីការប្តេជ្ញាចិត្តរបស់រដ្ឋាភិបាល ក្នុងការធ្វើកំណែទម្រង់ផ្ទៃក្នុងដ៏មុតស្រួច សំដៅលើកកម្ពស់គុណភាព ប្រសិទ្ធភាព និងស័ក្តិសិទ្ធភាពការអនុវត្តការងារស្នូលរបស់ស្ថាប័ន តាមរយៈការកាត់បន្ថយនូវនីតិវិធី និងចំណាយមិនចាំបាច់ផ្សេងៗ និងការផ្តល់កិច្ចសម្របសម្រួលវិនិយោគគ្រប់ជ្រុងជ្រោយ ចាប់តាំងពីការដាក់ពាក្យស្នើសុំវិនិយោគ រហូតដល់គម្រោងវិនិយោគអាចចាប់ផ្តើមប្រតិបត្តិការបានដោយរលូនជាដើម។

កម្មវិធីទាំងមូល បានឆ្លុះបញ្ចាំងពីស្មារតីសហប្រតិបត្តិការជិតស្និទ្ធ បើកចំហ និងប្រកបដោយទំនុកចិត្តរបស់សហគមន៍ធុរកិច្ច-វិនិយោគអន្តរជាតិ មកកាន់រាជរដ្ឋាភិបាលកម្ពុជា ដែលបាននិងកំពុងរួមគ្នាពង្រឹងកិច្ចសហការ តាមរយៈយន្តការសន្ទនាពិភាក្សាផ្ទាល់ៗ ត្រង់ទៅត្រង់មក ដើម្បីធានាបាននូវបរិយាកាសវិនិយោគអំណោយផល និងពោរពេញដោយទំនុកចិត្តរវាងគ្នាជាដើម៕ (អានបន្ថែម)