ក្រុមហ៊ុនចិន ចាប់អារម្មណ៍វិនិយោគរោងចក្រផលិតស៊ីម៉ងត៍ និងថាមពលកកើតឡើងវិញនៅកម្ពុជា

Proeksa Meas
22 ខែកក្កដា 2026
ព័ត៌មានសំណង់
421 មើល

ក្រុមហ៊ុនយក្សមួយរបស់ចិន China Energy International បានបង្ហាញចំណាប់អារម្មណ៍ក្នុងការពង្រីកការវិនិយោគរបស់ខ្លួននៅកម្ពុជា ពិសេសរោងចក្រផលិតស៊ីម៉ងត៍ និងវិស័យថាមពលកកើតឡើងវិញ។ ការបញ្ជាក់នេះ ធ្វើឡើងកាលថ្ងៃទី១៥ ខែកក្កដា ឆ្នាំ២០២៦ ក្នុងជំនួបរវាងសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ជាមួយលោក Qiao Xubin ប្រធានក្រុមហ៊ុន China Energy International Group Co., Ltd. នៅប្រទេសចិន។

នាឱកាសនោះ លោក Qiao Xubin បានឱ្យដឹងថា បច្ចុប្បន្នក្រុមហ៊ុនមានចំណាប់អារម្មណ៍ក្នុងការពង្រីកការវិនិយោគរបស់ខ្លួនលើវិស័យថ្មីៗបន្ថែមទៀត រួមមាន៖ ការផលិតស៊ីម៉ងត៍, ប្រព្រឹត្តកម្មទឹកស្អាត និងវិស័យថាមពលកកើតឡើងវិញ។ ជាមួយគ្នានេះ ក្រុមហ៊ុនពិតជារីករាយដែលបានចូលរួមចំណែកដល់ការកសាង និងអភិវឌ្ឍវិស័យថាមពលនៅកម្ពុជា។

ជាការឆ្លើយតប សម្ដេចធិបតីស្វាគមន៍យ៉ាងកក់ក្តៅចំពោះបំណងរបស់ក្រុមហ៊ុន ក្នុងការពង្រីកការវិនិយោគលើវិស័យសក្ដានុពលបន្ថែមទៀតនៅកម្ពុជា ខណៈរដ្ឋាភិបាល ចាត់ទុកការអភិវឌ្ឍវិស័យថាមពលស្អាត គឺជាអាទិភាពចម្បង។ សម្តេចថា បច្ចុប្បន្ននេះ កម្ពុជាបានប្រើប្រាស់ថាមពលកកើតឡើងវិញប្រមាណ ៦២% រួចទៅហើយ និងកំពុងជំរុញឱ្យសម្រេចបានរហូតដល់ ៧០% ត្រឹមឆ្នាំ ២០៣០។ សម្តេច ក៏ជំរុញ ក្រុមហ៊ុនពិភាក្សាជាមួយក្រសួងស្ថាប័នកម្ពុជា ដើម្បីសម្រេចក្នុងការវិនិយោគរបស់ខ្លួននៅកម្ពុជា។

សូមជម្រាបដែរថា ក្រុមហ៊ុន China Energy International បច្ចុប្បន្នមានប្រតិបត្តិការអាជីវកម្មនៅកម្ពុជាដោយបានផ្ដោតលើការអនុវត្តវិស្វកម្ម លទ្ធកម្ម និងការសាងសង់ (Engineering, Procurement, and Construction – EPC) សម្រាប់គម្រោងហេដ្ឋារចនាសម្ព័ន្ធថាមពលសំខាន់ៗ៕

- Video Advertisement -