ក្រុមហ៊ុនចិនស្នើវិនិយោគរោងចក្រកែច្នៃលោហធាតុសម្រាប់ធ្វើអាគុយរថយន្តនៅខេត្តព្រះសីហនុ

Proeksa Meas
1 ខែមិថុនា 2026
ព័ត៌មានសំណង់
767 មើល

នាពេលឆាប់ខាងមុខនេះ រោងចក្រកែច្នៃលោហធាតុជាគ្រឿងបង្គុំសម្រាប់ធ្វើអាគុយរថយន្តមួយនឹងលេចវត្តមានក្រុងព្រះសីហនុ ខេត្តព្រះសីហនុ ខណៈបច្ចុប្បន្នរដ្ឋបាលខេត្តបានចុះពិនិត្យទីតាំងសំណើរគម្រោងរោងចក្រនេះរួចរាល់ហើយ។

លោក ឡុង ឌីម៉ង់ អភិបាលរងខេត្ត និងជាអនុប្រធានអនុគណៈកម្មាធិការវិនិយោគខេត្តព្រះសីហនុ កាលថ្ងៃទី២៥ ខែឧសភា ឆ្នាំ២០២៦ បានដឹកនាំមន្ត្រីជំនាញពាក់ព័ន្ធនាចុះពិនិត្យទីតាំងស្នើសុំចុះបញ្ជីគម្រោងវិនិយោគបង្កើតរោងចក្រកែច្នៃលោហធាតុជាគ្រឿងបង្គុំសម្រាប់ធ្វើអាគុយរថយន្ត របស់ក្រុមហ៊ុនចិនភូ ហ្វេង ញូអេនើជី ថេកណូឡូជី ឯ.ក. (Pu Feng New Energy Technology Co.,LTD) ដែលមានទីតាំងនៅក្នុងសង្កាត់លេខ១ ក្រុងព្រះសីហនុ ខេត្តព្រះសីហនុ។

ជាមួយគ្នានេះ លោកអភិបាលរង បានស្នើឱ្យក្រុមហ៊ុនផ្តល់អាទិភាពការងារដល់ប្រជាពលរដ្ឋមូលដ្ឋាន និងត្រូវភ្ជាប់សេវាប.ស.ស.ជូនបុគ្គលិក និងកម្មករឱ្យបានត្រឹមត្រូវ រៀបចំអគារឱ្យមានខ្យល់ចេញចូលល្អ មានច្រកចេញចូលសុវត្ថិភាព និងបំពាក់ឧបករណ៍បង្ការអគ្គិភ័យឱ្យបានគ្រប់គ្រាន់ និងចូលរួមដាំដើមឈើឱ្យបានច្រើនដើម្បីផ្តល់ផាសុកភាពដល់បុគ្គលិក និងកម្មករនៅទីតាំងផងដែរ។

សូមជម្រាបថា រោងចក្រកែច្នៃលោហធាតុជាគ្រឿងបង្គុំសម្រាប់ធ្វើអាគុយរថយន្តមួយ មានទីផ្សារគោលដៅនៅប្រទេសចិន។ តាមការបញ្ជាក់ពីម្ចាស់សំណើ នៅពេលពេញសមត្ថភាព រោងចក្រនេះនឹងមានតម្រូវការកម្លាំងពលកម្មសរុបប្រមាណ ១០០នាក់ផងដែរ៕