មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល សាងសង់សម្រេចបានលទ្ធផលជិត៦០%ហើយ

Sommana Yan
9 ខែឧសភា 2026
ព័ត៌មានសំណង់
388 មើល

គិតត្រឹមខែមេសា ឆ្នាំ២០២៦នេះ ការងារសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបានលទ្ធផលជិត៦០% ហើយ បន្ទាប់ពីបានចាប់ផ្ដើមសាងសង់ជាផ្លូវការកាលពីថ្ងៃទី៩ ខែធ្នូ ឆ្នាំ២០២៤ កន្លងទៅ។នេះបើយោងតាម កិច្ចប្រជុំត្រួតពិនិត្យវឌ្ឍនភាពរួមគ្នាលើកទី៣ នៃគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល ដឹកនាំដោយលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល កាលថ្ងៃទី២៩ ខែមេសា ឆ្នាំ២០២៦។

តាមរយៈកិច្ចប្រជុំ បានផ្តោតលើការពិនិត្យវឌ្ឍនភាពរួមគ្នា លើការងារសាងសង់ ការងារបណ្តុះបណ្តាល ការងារផ្គត់ផ្គង់បរិក្ខារពេទ្យ និងប្រព័ន្ធគ្រប់គ្រងមន្ទីរពេទ្យអេឡិចត្រូនិច ជាពិសេសការងារសម្របសម្រួល និងការដោះស្រាយនូវបញ្ហាប្រឈមផ្សេងៗ ដើម្បីជម្រុញឱ្យគម្រោងសាងសង់មន្ទីរពេទ្យបានដោយជោគជ័យ។

គួរជម្រាបថា គិតត្រឹមខែមេសា ឆ្នាំ២០២៦នេះ ការងារសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបានលទ្ធផល ៥៧,៤៤%។មន្ទីរពេទ្យនេះ សាងសង់ឡើងនៅលើទីតាំងទី៣ នៃសាកលវិទ្យាល័យវិទ្យាសាស្ត្រសុខាភិបាល ដែលមានផ្ទៃដីសរុប ២២.២៤៣ ម៉ែត្រការ៉េ បណ្តោយ ៨៣,៨០ ម៉ែត្រ និងទទឹង ៥៩,៨០ ម៉ែត្រ និងកម្ពស់ ៨ជាន់ មានសមត្ថភាពទទួលជំងឺសម្រាកសរុបបាន ២០០គ្រែ។

គម្រោងមន្ទីរនេះ បានទទួលការអនុម័តពីរាជរដ្ឋាភិបាលកម្ពុជា អនុញ្ញាតឱ្យប្រើប្រាស់ថវិកាកម្ចីសម្បទានរបស់រដ្ឋាភិបាលសាធារណរដ្ឋកូរ៉េនូវទឹកប្រាក់ឥណទានចំនួន ៦៦,៥៧ លានដុល្លារ។ កិច្ចសន្យាសាងសង់មានរយៈពេល ២៨ខែ គ្រោងនឹងបញ្ចប់នៅខែមីនា ឆ្នាំ២០២៧ ខាងមុខ៕ (អានបន្ថែម)