ក្រុមហ៊ុនដំឡើងគ្រឿងចក្រសំណង់ដ៏ធំរបស់វៀតណាម គ្រោងបើករោងចក្រនៅខេត្តកំពង់ស្ពឺ

Proeksa Meas
7 ខែកក្កដា 2026
ព័ត៌មានសំណង់
296 មើល

ក្រុមហ៊ុនដំឡើងគ្រឿងចក្រសំណង់ដ៏ធំរបស់វៀតណាម បានបង្ហាញមហិច្ឆតាចង់បង្កើតរោងចក្រនៅខេត្តកំពង់ស្ពឺ ក្រោមទុនវិនិយោគរាប់លានដុល្លារអាមេរិកនាពេលខាងមុខ។ នេះបើតាមសម្តីរបស់លោក ចាន់ ហ៊ុន អគ្គនាយកក្រុមហ៊ុន តាធីផាត ខូអិលធីឌី(TA THI PHAT Co.,LTD) ក្នុងជំនួបជាមួយឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ កាលពីពេលថ្មីៗនេះ។

នាជំនួបនោះ លោក ចាន់ ហ៊ុន អគ្គនាយកក្រុមហ៊ុន តា ធី ផាត ខូអិលធីឌី (TA THI PHAT Co., LTD)ប្រចាំកម្ពុជា បាននិយាយថា ធុរៈជនរបស់ប្រទេសវៀតណាមគឺមានរោងចក្រដំឡើងគ្រឿងចក្រសំណង់ដ៏ធំនៅក្នុងទីក្រុងហាណូយ ក្រោមទុនវិនិយោគប្រមាណ ៧៥០លានដុល្លាសហរដ្ឋអាម៉េរិក។ ក្រោយដំណើរបានជោគជ័យលើជំនួញនេះ ធុរៈជនវៀតណាមមានមហិច្ឆតាពង្រីករោងចក្របន្ថែមដោយជ្រើសយកប្រទេសកម្ពុជា ជាបុត្រសម្ព័ន្ធ ពិសេសគឺខេត្តកំពង់ស្ពឺ ជាខេត្តគោលដៅ ហើយសម្រាប់រោងចក្របុត្រសម្ព័ន្ធនេះក្រុមហ៊ុនបានគ្រោងទុនវិនិយោគរាប់លានដុល្លារផងដែរ។

លោក ចាន់ ហ៊ុន ក៏បានបន្ថែមថា ការជ្រើសយកប្រទេសកម្ពុជា ពិសេសខេត្តកំពង់ស្ពឺជាខេត្តគោលដៅគឺដោយសារតែមើលឃើញកត្តានៃសុខសន្តិភាព ស្ថិរភាពនយោបាយ និងមើលឃើញពីសក្តានុពលនៃខេត្តនេះក្នុងការដំឡើងរោងចក្រ។

ជាការឆ្លើយតប ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ បានស្វាគមន៍នូវវត្តមានក្រុមហ៊ុន តា ធី ផាត ខូអិលធីឌី (TA THI PHAT Co.,LTD) នៅលើទឹកដីខេត្តកំពង់ស្ពឺ ខណៈឯកឧត្តមថា នឹងសម្របសម្រួលយ៉ាងពេញទំហឹងដល់ដំណើរការរបស់ក្រុមហ៊ុន ដែលមកផ្តល់ឱកាសការងារដល់ពលរដ្ឋក្នុងខេត្តនេះ ដើម្បីអភិវឌ្ឍន៍ខេត្តកំពង់ស្ពឺឱ្យកាន់តែរីកចម្រើនបន្ថែមទៀត។

បើតាមក្រុមហ៊ុនវៀតណាមខាងលើ បានបញ្ជាក់ថា គម្រោងរបស់ក្រុមហ៊ុននឹងចាប់ដំណើរការនៅដើមឆ្នាំ២០២៧ លើផ្ទៃដីប្រមាណជាង ២ហិកតា ជាជំហ៊ានដំបូង ដោយការដាក់តាំងលក់គ្រឿងចក្រដែលមានស្រាប់តំឡើងនៅប្រទេសវៀតណាម ដោយអតិថិជនអាចរំលោះ ឬជួល ហើយក្រោយមកក្រុមហ៊ុននិងដាក់រោងចក្រដើម្បីតំឡើងគ្រឿងចក្រទាំងនេះនៅក្នុងខេត្តកំពង់ស្ពឺជាជំហ៊ានទី២ ដែលអាចផ្តល់ឱកាសការងារយ៉ាងច្រើនដល់ប្រជាពលរដ្ឋក្នុងខេត្តនេះ៕

សូមបញ្ជាក់ថា តាមរយៈការស្វែងរកព័ត៌មានបន្ថែមពីបណ្តាញអ៊ីនធើណិត មិនមានព័ត៌មានផ្លូវការស្តីពីការចុះបញ្ជី ឬគេហទំព័រស្តីពីសវតាក្រុមហ៊ុន Ta Thi Phat Co Ltd នោះទេ។