ក្រុមហ៊ុនមួយចង់បង្កើតរោងចក្រកែច្នៃសណ្តែកសៀង និងចម្រាញ់ប្រេងពីសណ្តែកសៀងនៅកម្ពុជា

Proeksa Meas
2 ខែកញ្ញា 2026
ព័ត៌មានសំណង់
221 មើល

ក្រុមហ៊ុន HYPER HOPE NUTRITION (CAMBODIA) CO., LTD. បានបង្ហាញពីបំណងរបស់ខ្លួន តាមរយៈការបង្កើតរោងចក្រកែច្នៃសណ្តែកសៀង និងចម្រាញ់ប្រេងពីសណ្តែកសៀងនៅកម្ពុជានាពេលដ៏ខ្លីខាងមុខនេះ។ នេះបើតាមជំនួបពិភាក្សារវាងឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ជាមួយគណៈប្រតិភូក្រុមហ៊ុនដឹកនាំដោយលោក កុង ស៊ាង អ៊ី (GONG XIANG YU) ប្រធានក្រុមហ៊ុន កាលថ្ងៃទី២៦ ខែសីហា ឆ្នាំ២០២៦។

នាឱកាសនោះ លោកអគ្គលេខាធិការបានស្វាគមន៍គណៈប្រតិភូក្រុមហ៊ុន និងវាយតម្លៃខ្ពស់ចំពោះក្រុមហ៊ុនដែលជឿជាក់លើរាជរដ្ឋាភិបាលសម្រេចចិត្តបណ្តាក់ទុនវិនិយោគបង្កើតរោងចក្រផលិតចំណីសត្វនៅកម្ពុជាតាំងពីឆ្នាំ២០២៣ ហើយមកទល់បច្ចុប្បន្ន ក្រុមហ៊ុនបានដំណើរការផលិតកម្មដោយរលូន និងទទួលជោគជ័យក្នុងសកម្មភាពធុរកិច្ចនៅកម្ពុជា។

ជាមួយគ្នានេះ លោក កុង ស៊ាង អ៊ី ប្រធានក្រុមហ៊ុន បានមើលឃើញបរិស្ថានវិនិយោគល្អនៅកម្ពុជា ក្រុមហ៊ុនក៏មានបំណងពង្រីកការវិនិយោគរបស់ខ្លួនតាមរយៈការបង្កើតរោងចក្រកែច្នៃសណ្តែកសៀង និងចម្រាញ់ប្រេងពីសណ្តែកសៀង។ លោកបញ្ជាក់ថា គម្រោងពង្រីកការវិនិយោគនេះ នឹងចូលរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា ជាពិសេស តាមរយៈការបង្កើតការងារជូនប្រជាពលរដ្ឋកម្ពុជាទាំងដោយផ្ទាល់ និងដោយប្រយោល ព្រមទាំងអាចរួមចំណែកក្នុងការលើកកម្ពស់ការប្រើប្រាស់ និងកែច្នៃវត្ថុធាតុដើមកសិកម្មក្នុងស្រុក។

សូមជម្រាបដែរថា តាមរយៈជំនួបនោះ CDC ក៏ស្នើឱ្យក្រុមហ៊ុនសិក្សាលទ្ធភាពវិនិយោគដាំដុះសណ្តែកសៀង ដូចជា ខេត្តត្បូងឃ្មុំ ខេត្តកំពង់ចាម និងខេត្តក្រចេះ ដើម្បីជំរុញការចូលរួមរបស់ប្រជាកសិករកម្ពុជា និងបង្កើតប្រភពផ្គត់ផ្គង់វត្ថុធាតុដើមក្នុងស្រុកសម្រាប់រោងចក្ររបស់ក្រុមហ៊ុនផងដែរ៕