កំពង់ឆ្នាំងកំពុងប្រែខ្លួនជាមជ្ឈមណ្ឌលឧស្សាហកម្ម ជាមួយនឹងសហគ្រាសជាងពីរពាន់

Proeksa Meas
5 ខែមិថុនា 2026
ព័ត៌មានសំណង់
287 មើល

គិតមកដល់ពេលបច្ចុប្បន្ននេះ ខេត្តកំពង់ឆ្នាំង មានរោងចក្រសហគ្រាស និងសិប្បកម្មសរុបចំនួន ២.៧១២មូលដ្ឋាន ខណៈក្នុងនោះ មានរោងចក្រ សហគ្រាសធុនធំចំនួន ៤២កន្លែង។ នេះបើយោងតាមរបាយការណ៍របស់ឯកឧត្តម ស៊ុន សុវណ្ណារិទ្ធ អភិបាលខេត្តកំពង់ឆ្នាំង ក្នុងឱកាសជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានាជុំវិញខេត្តកំពង់ឆ្នាំង ក្រោមអធិបតីភាពសម្តេចតេជោ ហ៊ុន សែន ប្រមុខរដ្ឋស្ដីទីកម្ពុជា កាលថ្ងៃទី២៧ ឧសភា ២០២៦។

នាឱកាសនោះ ឯកឧត្តម ស៊ុន សុវណ្ណារិទ្ធ បានឱ្យដឹងថា ខេត្តកំពង់ឆ្នាំង មានចម្ងាយ ៩១គីឡូម៉ែត្រ ពីរាជធានីភ្នំពេញ ស្ថិតនៅភាគកណ្តាលនៃប្រទេសកម្ពុជា មានព្រំប្រទល់ខាងកើតជាប់ខេត្តកំពង់ចាម ខាងត្បូងជាប់ខេត្តកំពង់ស្ពឺ ខេត្តកណ្តាល ខាងលិចជាប់ខេត្តពោធិ៍សាត់ និងខាងជើងជាប់ខេត្តកំពង់ធំ និងបឹងទន្លេសាប។

ឯកឧត្តមថា ខេត្តមានផ្ទៃដីសរុប ៥.៥២១គីឡូម៉ែត្រការ៉េ មានក្រុង ស្រុកចំនួន៨ ឃុំ-សង្កាត់ចំនួន៧១ និងភូមិចំនួន៥៦៩ភូមិ។ ខេត្តកំពង់ឆ្នាំងមានប្រជាជនចំនួន ១៦១.៣៣០គ្រួសារ និងប្រជាជនសរុបចំនួន៦១៥.៨៩៦នាក់។

រដ្ឋបាលខេត្តកំពង់ឆ្នាំង បានបញ្ជាក់បន្ថែមថា ក្រោមការដឹកនាំប្រកបដោយគតិបណ្ឌិត និងមុតស្រួចរបស់រដ្ឋាភិបាល កំពង់ឆ្នាំងសម្រេចបាននូវសមិទ្ធផលធំៗជាច្រើនគ្រប់វិស័យ ក្នុងនោះខេត្តមានរោងចក្រសហគ្រាស និងសិប្បកម្មសរុបចំនួន ២.៧១២មូលដ្ឋាន។ រោងចក្រសហគ្រាសធុនធំចំនួន ៤២កន្លែង មានកម្មករ និយោជិតចំនួន ៧៦.៩២៤នាក់។ ចំណែកឯការផ្គត់ផ្គង់ទឹកស្អាតចំនួន ២១ក្រុមហ៊ុន និងផ្គត់ផ្គង់ទៅដល់ ៤៣ឃុំ និង ២៨៥ភូមិ៕

- Video Advertisement -