ក្រុមហ៊ុនម៉ាឡេស៊ីបោះទុន ៦៨លានដុល្លារ បង្កើតកសិដ្ឋានទឹកដោះគោធំបំផុតនៅខេត្តពោធិ៍សាត់

Proeksa Meas
17 ខែសីហា 2026
ព័ត៌មានសំណង់
595 មើល

កិច្ចសហការវិនិយោគជាមួយ Alpha Group និង Sonavith Co., Ltd. គម្រោងរួមបញ្ចូលគ្នាទំហំ ១០០០ហិកតានេះ នឹងបង្ហាញពីការចិញ្ចឹមគោ និងការកែច្នៃទឹកដោះគោតាមស្តង់ដារអន្តរជាតិ ដើម្បីបង្កើនការផ្គត់ផ្គង់ និងបង្កើតការងារក្នុងស្រុក

កសិដ្ឋានទឹកដោះគោធំបំផុតនៅកម្ពុជាជាលើកដំបូង នឹងលេចរូបរៀងនៅក្នុងខេត្តពោធិ៍សាត់ ខណៈបច្ចុប្បន្នក្រុមហ៊ុនផលិតទឹកដោះគោយក្សរបស់ម៉ាឡេស៊ី Farm Fresh Berhad (Farm Fresh Malaysia) និងក្រុមហ៊ុន Alpha Group បានសហការជាមួយក្រុមហ៊ុន សូណាវីត (SONAVITH Co., Ltd.) របស់កម្ពុជាដើម្បីបង្កើតកសិដ្ឋានទឹកដោះគោ ដែលមានតម្លៃទុនរហូត ៦៨លានដុល្លារអាម៉េរិក។

ឯកឧត្តម ខូយ រីដា អភិបាលខេត្តពោធិ៍សាត់ កាលថ្ងៃទី៥ ខែសីហា ឆ្នាំ២០២៦ បានឱ្យដឹងថា តាមរយៈការវិនិយោគដ៏ធំនេះ ខេត្តពោធិ៍សាត់នឹងមានកសិដ្ឋានចិញ្ចឹមគោយកទឹកដោះដ៏ធំមួយនៅកម្ពុជា ដែលនឹងបង្កើតឱកាសការងារជាច្រើនសម្រាប់ប្រជាពលរដ្ឋ និងជាប្រវត្តិសាស្ត្រថ្មីរបស់ខេត្ត ក៏ដូចជាសម្រាប់ប្រទេសកម្ពុជា។

ជាមួយគ្នានេះ លោក Loi Tuan Ee នាយកក្រុមហ៊ុនម៉ាឡេស៊ី បានបង្ហាញក្តីរីករាយក្នុងការវិនិយោគនៅខេត្តពោធិ៍សាត់ ដោយសារទទួលបានការលើកទឹកចិត្ត និងការសម្របសម្រួលពីរាជរដ្ឋាភិបាលកម្ពុជា។លោកបន្ថែមថា ក្នុងនាមជាក្រុមហ៊ុនផលិតទឹកដោះគោឈានមុខមួយនៅតំបន់អាស៊ីអាគ្នេយ៍ ការមកបណ្តាក់ទុននៅខេត្តពោធិ៍សាត់ នឹងជួយភ្ជាប់ឈ្មោះរបស់ខេត្តទៅកាន់តំបន់អាស៊ីអាគ្នេយ៍ និងពិភពលោកទាំងមូល។

សូមជម្រាបដែរថា ក្រុមហ៊ុន FARM FRESH (PURSAT) នឹងវិនិយោគទុនសរុបចំនួន ៦៨ លានដុល្លារអាម៉េរិក ដើម្បីអភិវឌ្ឍកសិដ្ឋានចិញ្ចឹមគោយកទឹកដោះ និងសាងសង់រោងចក្រកែច្នៃ។ កសិដ្ឋានចិញ្ចឹមគោយកទឹកដោះ និងរោងចក្រនេះ សាងសង់លើផ្ទៃដីចំនួន ១,០០០ ហិកតា ក្នុងទឹកដីខេត្តពោធិ៍សាត់៕ (អានបន្ថែម)