ខេត្តព្រះវិហារ មានរ៉ែសំខាន់ ៣ប្រភេទ និងមាន ១៣ក្រុមហ៊ុន ទទួលបានអាជ្ញាបណ្ណវិនិយោគ

• Proeksa Meas
• 28 ខែ​កក្កដា 2026
• ព័ត៌មានសំណង់
• 122 មើល

នៅក្នុងភូមិសាស្ត្រខេត្តមានធនធានរ៉ែសំខាន់ៗ ចំនួន៣ប្រភេ ដូចជា៖ រ៉ែមាស រ៉ែដែក រ៉ែលោហៈ ហើយបច្ចុប្បន្ន មាន ១៣ក្រុមហ៊ុនទទួលបានអាជ្ញាបណ្ណវិនិយោគលើប្រភេទរ៉ែទាំងនេះ។ នេះបើយោងតាមរបាយការណ៍របស់ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ក្នុងដំណើរចុះជួបសំណេះសំណាលរបស់សម្តេតេជោ ហ៊ុន សែន ប្រធានព្រឹទ្ធសភាកម្ពុជា ជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានាជុំវិញខេត្តព្រះវិហារ កាលទី១០ ខែកក្កដា ឆ្នាំ២០២៦។

នាឱកាសនោះ បើតាមរបាយការណ៍របស់ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារបានឱ្យដឹងថា ខេត្តព្រះវិហារស្ថិតនៅភាគឧត្តរនៃព្រះរាជាណាចក្រកម្ពុជាមានក្រឡាផ្ទៃប្រមាណជាង ១៣ពាន់គីឡូម៉ែត្រក្រឡា បែងចែកជា១ក្រុង ៧ស្រុក ៤៩ឃុំ២សង្កាត់ និង២៣២ភូមិ។ ខេត្តព្រះវិហារមានសម្បត្តិធនធានធម្មជាតិព្រៃឈើ និងប្រាសាទបុរាណជាច្រើនក្នុងនោះមានប្រាសាទបុរាណដែលបានចុះក្នុងបញ្ជីបេតិកភណ្ឌពិភពលោកចំនួន២ គឺប្រាសាទព្រះវិហារ និងប្រាសាទកោះកេរ។

ក្នុងភូមិសាស្ត្រខេត្តព្រះវិហារនេះដែរ ឯកឧត្តមថា ក៏មានធនធានរ៉ែសំខាន់ៗ ដូចជារ៉ែមាស រ៉ែដែក រ៉ែលោហៈ ដែលមានអាជ្ញាបណ្ណធនធានរ៉ែ ៥អាជ្ញាបណ្ណ ស្មើនឹង ៣ក្រុមហ៊ុន អាជ្ញាបណ្ណអណ្តូងរ៉ែ និងការដ្ឋានវាយថ្ម ១២អាជ្ញាបណ្ណ ស្មើនឹង១០ក្រុមហ៊ុន។

សូមជម្រាបថា ខេត្តព្រះវិហារមានសក្តានុពល គឺពឹងផ្អែកលើវិស័យកសិកម្ម ជាពិសេសគឺការជំរុញផលិតកម្មស្រូវសរីរាង្គដែលបានចងក្រងជាសហគមន៍កសិកម្មចំនួន ៤៧សហគមន៍ ដើម្បីចុះកិច្ចសន្យាទិញលក់ជាមួយក្រុមហ៊ុនសហគ្រាសចំនួន ៩ក្រុមហ៊ុន។ ក្រៅពីនេះខេត្តមានដាំដំណាំយុទ្ធសាស្ត្រសំខាន់ៗដូចជាស្វាយចន្ទី ប្រមាណ៣ម៉ឺនហិកតា ដំណាំស្វាយប្រមាណ ៨ពាន់ហិកតា ដំឡូងមីប្រមាណ ៤ម៉ឺនហិកតា និងកៅស៊ូប្រមាណ៣ម៉ឺនហិកតា ដាំលក្ខណៈជាក្រុមហ៊ុនសម្បទានសេដ្ឋកិច្ចចំនួន ១៥ក្រុមហ៊ុន និងលក្ខណៈជាគ្រួសារ៕ (អានបន្ថែម)

• Mineral
• Preah Vihear