រដ្ឋាភិបាលពិនិត្យលើគម្រោងស្នើសុំបង្កើតតំបន់សេដ្ឋកិច្ចពិសេសធំមួយក្នុងខេត្តស្វាយរៀង

Proeksa Meas
19 ខែកញ្ញា 2026
ព័ត៌មានសំណង់
199 មើល

កិច្ចប្រជុំយន្តការច្រកចេញចូលតែមួយ (Single Window) លើកទី ៥ បានពិនិត្យលើផែនការអភិវឌ្ឍន៍បន្តពីមូលដ្ឋានគ្រឹះនៃតំបន់សេដ្ឋកិច្ចពិសេស Manhattan (Manhattan SEZ) ដែលមានទំហំ ៣១៥ ហិកតា និងជាតំបន់ត្រួសត្រាយផ្លូវដ៏សំខាន់មួយនៅមជ្ឈមណ្ឌលពាណិជ្ជកម្មតាមព្រំដែនដ៏លេចធ្លោរបស់កម្ពុជា

រាជរដ្ឋាភិបាល តាមរយៈគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានបើកកិច្ចប្រជុំច្រកចេញ-ចូលតែមួយ លើកទី៥ ក្នុងឆ្នាំ២០២៦ ដើម្បីពិនិត្យពិភាក្សាលើគម្រោងស្នើសុំបង្កើតតំបន់សេដ្ឋកិច្ចពិសេស មេនហាតធេន ទី២ ក្នុងខេត្តស្វាយរៀង។ កិច្ចប្រជុំនេះ ដឹកនាំដោយ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងមានការអញ្ជើញចូលរួមពីសំណាក់តំណាងក្រសួង-ស្ថាប័ន និងតំណាងអភិបាលនៃគណៈអភិបាលខេត្តស្វាយរៀង។

នៅក្នុងកិច្ចប្រជុំនោះ ភាគីពាក់ព័ន្ធ បានពិនិត្យពិភាក្សាលើគម្រោងស្នើសុំបង្កើតតំបន់សេដ្ឋកិច្ចពិសេស មេនហាតធេន ទី២។ គម្រោងតំបន់សេដ្ឋកិច្ចពិសេស មេនហាតធេន ទី១ បានដំណើរការដោយទទួលបានជោគជ័យ លើទំហំផ្ទៃដី ៣១៥ ហិកតា ដែលបានបង្កើតតឡើងតាំងពីឆ្នាំ២០០៤។

សូមជម្រាបថា គិតមកដល់ពេលនេះ ខេត្តស្វាយរៀងនេះ មានតំបន់សេដ្ឋកិច្ចពិសេសកំពុងដំណើរការចំនួន ១៣ និងមានគម្រោងវិនិយោគសរុបចំនួន ៤២១ គម្រោង។ នេះបើយោងតាមដំណើរទស្សនកិច្ចនៅតំបន់សេដ្ឋកិច្ចពិសេសស៊ីន បាវិត និងតំបន់សេដ្ឋកិច្ចពិសេស ហ្វ័រសុន ហ្គីហ្គា កាលថ្ងៃទី១៧ ខែកក្កដា ឆ្នាំ២០២៦ ដឹកនាំដោយលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា (គ.វ.ក.) នៃក្រុមប្រឹក្សាអភិវឌ្ឍន៍កម្ពុជា៕ (អានបន្ថែម)