ក្រុមហ៊ុនធំ២ នឹងរួមគ្នាជំរុញដំណោះស្រាយថាមពលស្អាតនៅទូទាំងប្រទេសកម្ពុជា និងអាស៊ាន

Proeksa Meas
30 ខែមេសា 2026
ព័ត៌មានសំណង់
501 មើល

ក្រុមហ៊ុន រ៉ូយ៉ាល់ គ្រុប និងក្រុមហ៊ុន Greenlyzer បានសម្រេចចុះអនុស្សរណៈនៃការយោគយល់គ្នា ដើម្បីរួមគ្នាជំរុញដំណោះស្រាយថាមពលស្អាតនៅទូទាំងប្រទេសកម្ពុជា និងអាស៊ានឱ្យកាន់តែប្រសើរ។ នេះបើយោងតាមការប្រកាសរបស់ក្រុមហ៊ុន រ៉ូយ៉ាល់ គ្រុប ផ្សព្វផ្សាយចេញនៅថ្ងៃទី២១ ខែមេសា ឆ្នាំ២០២៦។

ប្រភពដដែលបានឱ្យដឹងថា MoU នេះត្រូវបានចុះហត្ថលេខានៅប្រទេសសិង្ហបុរី។ MoU នេះ បានរួមបញ្ចូលនូវបច្ចេកវិទ្យាថាមពលទំនើបរបស់ក្រុមហ៊ុន Greenlyzer ជាមួយនឹងបណ្តាញភ្ជាប់ និងលទ្ធភាពប្រតិបត្តិការដ៏ទូលំទូលាយរបស់ក្រុមហ៊ុន រ៉ូយ៉ាល់ គ្រុប ដើម្បីពន្លឿនការអភិវឌ្ឍអ៊ីដ្រូសែនបៃតង និងស្វែងរកដំណោះស្រាយជំនាន់ថ្មី រួមទាំងបណ្តាញអគ្គិសនីចល័តបៃតង (Green Moving Grid) ផងដែរ។

អ្នកឧកញ៉ា គិត ម៉េង បានគូសបញ្ចាក់ថា៖ «ភាពជាដៃគូនេះបង្ហាញយ៉ាងច្បាស់ពីការប្តេជ្ញាចិត្តរបស់យើង ក្នុងការជំរុញនវានុវត្តន៍ថាមពលស្អាត។ ក្នុងនាមជាក្រុមហ៊ុនចម្រុះធំជាងគេបំផុតនៅកម្ពុជា យើងនាំមកនូវទំហំបណ្តាញភ្ជាប់ និងលទ្ធភាពប្រតិបត្តិការរបស់យើង រួមជាមួយបច្ចេកវិទ្យាទំនើបរបស់ក្រុមហ៊ុន Greenlyzer ដើម្បីពន្លឿនការទទួលយកអ៊ីដ្រូសែនបៃតង និងបង្កើតគំរូថ្មីនៃការផលិតថាមពលប្រកប ដោយចីរភាព។

សូមជម្រាបថា តាមរយៈ MoU ខាងលើ គឺជាជំហានដ៏សំខាន់មួយឆ្ពោះទៅកាន់ការកសាងហេដ្ឋារចនាសម្ព័ន្ធថាមពលសម្រាប់អនាគត ដែលគាំទ្រដល់ការរីកចម្រើនរបស់កម្ពុជា និងរួមចំណែកដល់ការបត់បែនថាមពលរយៈពេលវែងសម្រាប់តំបន់អាស៊ានទាំងមូល៕