Smart Eden ប្រកាសនាំផលិតផលកម្ពុជាចេញទៅទីផ្សារបារាំង ដែលមានបណ្ដាញរហូតដល់ ៦ពាន់ទីតាំង

Sommana Yan
5 ខែមេសា 2025
Uncategorized @km
114 មើល

ក្រុមហ៊ុន Smart Eden គ្រោងពង្រីកការនាំចេញផលិតផលកម្ពុជាទៅកាន់ទីផ្សារបារាំង ដែលបច្ចប្បន្នមានបណ្តាញចែកចាយរហូតដល់ជាង ៦.០០០ទីតាំងនៅទូទាំងប្រទេសបារាំង។ នេះបើតាមឱ្យដឹងក្នុងជំនួបមួយរវាង ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងនាយកប្រតិបត្តិលោក Laurent Strauch និងអ្នកឧកញ៉ា ហ៊ុន ឡាក់ នៅថ្ងៃទី០១ ខែមេសា ឆ្នាំ២០២៥។

នៅក្នុងជំនួបនេះ លោក Laurent Strauch បានលើកឡើងថា ក្រុមហ៊ុន Smart Eden បាននាំចេញគ្រាប់ស្វាយចន្ទី និងដំណាប់ស្វាយពីកម្ពុជាតាំងពីឆ្នាំ២០២៤ ហើយទទួលបានការគាំទ្រច្រើនពីអតិថិជននៅក្នុងប្រទេសបារាំង។ លោកបានជម្រាបជូនអំពីដំណើរការរបស់ Smart Eden ដែលជាក្រុមហ៊ុនចែកចាយផលិតផលដ៏ធំ បច្ចុប្បន្នមានបណ្តាញលក់រហូតដល់ជាង ៦.០០០ទីតាំង នៅទូទាំងប្រទេសបារាំង។

លោក Strauch បានបញ្ជាក់ថា ក្រុមហ៊ុនមានបំណងចង់ពង្រីកការនាំចេញផលិតផលកម្ពុជា ពី ១០ ទៅ ១៥មុខ ក្នុងឆ្នាំ២០២៥ នេះ ក្នុងនោះរួមមាន៖ អង្ករ ម្រេច ស្ករត្នោត និងធ្យូងអនាម័យ ហើយក៏គ្រោងផលិតបឺរពីគ្រាប់ស្វាយចន្ទី ដើម្បីនាំចេញទៅបារាំងផងដែរ។

លើសពីនេះ Strauch បានបង្ហាញចំណាប់អារម្មណ៍ក្នុងការទាញយកទីតាំងយុទ្ធសាស្ត្ររបស់កម្ពុជាជាមជ្ឈមណ្ឌលសម្រាប់ការចែកចាយផលិតផលបារាំងដែលមានគុណភាពទូទាំងតំបន់ ដែលបង្ហាញពីកិច្ចសហការដ៏មានសក្តានុពលដែលអាចបង្កើនទំនាក់ទំនងពាណិជ្ជកម្មបានថែមទៀតផង។

ទន្ទឹមគ្នានេះដែរ ឯកឧត្តម ហែម វណ្ណឌី បានបង្ហាញពីសារៈសំខាន់នៃការអភិវឌ្ឍន៍ទាំងនេះ ដោយបានរំលឹកឡើងវិញនូវការប្តេជ្ញាចិត្តរបស់រដ្ឋាភិបាលកម្ពុជាក្នុងការផ្តល់អាទិភាពដល់ការរីកចម្រើននៃវិស័យគ្រាប់ស្វាយចន្ទីជាទំនិញយុទ្ធសាស្ត្រ និងចង់ដាក់ប្រទេសកម្ពុជាជាអ្នកផ្គត់ផ្គង់ផលិតផលគ្រាប់ស្វាយចន្ទីធំជាងគេលើពិភពលោក។

បន្ថែមពីនេះ ឯកឧត្តម បានលើកឡើងពីសារៈសំខាន់នៃការប្រមូលផ្តុំក្នុងខ្សែច្រវាក់ផ្គត់ផ្គង់ ដែលជំរុញដោយទីផ្សារ ដើម្បីទាញយកឧត្តមភាពនៃសេដ្ឋកិច្ចមាត្រដ្ឋាន និងបំពេញតាមតម្រូវការទីផ្សារ។

ជាចុងក្រោយ ឯកឧត្តមក៏បានសាទរ និងគាំទ្រយ៉ាងពេញទំហឹងដែលក្រុមហ៊ុនចង់ផលិតបឺរពីគ្រាប់ស្វាយចន្ទី ដោយលើកទឹកចិត្តក្រុមហ៊ុនឱ្យសិក្សាផលិតផលសក្តានុពលផ្សេងៗទៀតរបស់កម្ពុជា និងសហការជាមួយក្រុមការងារ របស់ក្រសួង និងដៃគូ ដូចជាសហគ្រិនខ្មែរជាដើម។

គំនិតផ្តួចផ្តើមនេះបង្ហាញពីការបោះជំហានទៅមុខដ៏ជោគជ័យមួយសម្រាប់សេដ្ឋកិច្ចកម្ពុជា ជំរុញពាណិជ្ជកម្មអន្តរជាតិ និងការបង្ហាញសក្តានុពលកសិកម្មរបស់ប្រទេសជាតិនៅលើវេទិកាសកល។

- Video Advertisement -