ក្រុមហ៊ុនកូរ៉េមានបំណងបោះទុនវិនិយោគលើរោងចក្រផលិតគ្រឿងសង្ហារិម និងកែច្នៃកសិផលនៅកម្ពុជា

Proeksa Meas
25 ខែសីហា 2026
ព័ត៌មានសំណង់
516 មើល

ក្រុមហ៊ុនកូរ៉េធំៗមួយចំនួនរបស់កូរ៉េ បានបង្ហាញពីបំណងមកបោះទុនវិនិយោគនៅកម្ពុជា ដោយផ្តោតលើឧស្សាហកម្មផលិតគ្រឿងសង្ហារិម និងការកែច្នៃកសិផល។ នេះបើយោងតាមជំនួបពិភាក្សារវាងឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាមួយគណៈប្រតិភូសភាពាណិជ្ជកម្ម និងឧស្សាហកម្ម (ICCI) ដឹកនាំដោយ លោក Park Joo-bong ប្រធាន ICCI កាលថ្ងៃទី១៧ ខែសីហា ឆ្នាំ២០២៦។

នាឱកាសនោះ លោកប្រធាន ICCI បានបង្ហាញក្តីសេចក្តីរីករាយនៃយុទ្ធនាការផ្សព្វផ្សាយវិនិយោគកន្លងមក ដែលក្នុងនោះមានបណ្តាញសារព័ត៌មានកូរ៉េចំនួន ៣៨ស្ថាប័នបានចុះផ្សាយ និងបង្កើតឱ្យមានការចាប់អារម្មណ៍យ៉ាងខ្លាំងពីសំណាក់អ្នកវិនិយោគ និងសហគមន៍ធុរកិច្ចកូរ៉េ អំពីសក្តានុពលរបស់កម្ពុជា។

លោកបញ្ជាក់ថា យុទ្ធនាការកន្លងមកនេះបាននិងកំពុងបង្ហាញពីសញ្ញាណវិជ្ជមានយ៉ាងខ្លាំង ដោយក្នុងនោះមានក្រុមហ៊ុនកូរ៉េធំៗមួយចំនួនបានបង្ហាញបំណងក្នុងការមកបោះទុនវិនិយោគនៅកម្ពុជា ដោយផ្តោតលើវិស័យផលិតគ្រឿងសង្ហារិម និងការកែច្នៃកសិផលផងដែរ។

ជាការឆ្លើយតប ឯកឧត្តមឧបនាយករដ្ឋមន្ត្រី បានគាំទ្រយ៉ាងពេញទំហឹងលើគម្រោងនេះ ហើយថាក្នុងនាមរដ្ឋាភិបាលកម្ពុជាត្រៀមខ្លួនជាស្រេចក្នុងការផ្តល់កិច្ចសម្របសម្រួល សំដៅជំរុញឱ្យគម្រោងនេះលេចរូបរាងឡើង ដើម្បីជាប្រយោជន៍លើការអភិវឌ្ឍធនធានមនុស្ស ការលើកកម្ពស់ជំនាញបច្ចេកទេសកម្លាំងពលកម្មកម្ពុជា ជាការឆ្លើយតបបានយ៉ាងចំទិសដៅទៅនឹងតម្រូវការកម្លាំងពលកម្មជំនាញរបស់អ្នកវិនិយោគកូរ៉េនៅកម្ពុជា នាពេលអនាគត។

តាមរយៈជំនួបខាងលើ សភាពាណិជ្ជកម្ម និងឧស្សាហកម្ម (ICCI) ក៏មានគម្រោង បង្កើតមជ្ឈមណ្ឌលបណ្តុះបណ្តាលបច្ចេកទេសជំនាញ ដោយគ្រោងនឹងមានការចុះអនុស្សរណៈនៃការយោគយល់គ្នា (MoU) ជាមួយវិទ្យាស្ថានជាតិពហុបច្ចេកទេសកម្ពុជា (NPIC) និងក្រសួងការងារផងដែរ៕ (អានបន្ថែម)