កម្ពុជា-តួកគី ឯកភាពគ្នាបង្កើនទំហំពាណិជ្ជកម្មទ្វេភាគីឱ្យបាន ១ពាន់លានដុល្លារ

Sommana Yan
4 ខែមិថុនា 2024
ព័ត៌មានក្នុងស្រុក
213 មើល

កម្ពុជា និងតួកគី បានសម្រេចឯកភាពគ្នា ក្នុងការជំរុញទំហំពាណិជ្ជកម្មទ្វេភាគីឱ្យកើនដល់ ១ពាន់លានដុល្លារអាម៉េរិកនាពេលខាងមុខ។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិចុះថ្ងៃទី៣០ ខែឧសភា ឆ្នាំ២០២៤។

បើតាមសេចក្តីប្រកាសព័ត៌មាននេះបានឱ្យដឹងថា លោក សុខ ចិន្តាសោភា រដ្ឋមន្ត្រីក្រសួងការបរទេស បានធ្វើទស្សនកិច្ចរយៈពេល ០២ថ្ងៃ នៅសាធារណរដ្ឋតួកគី ដើម្បីពង្រីកវិសាលភាពនៃកិច្ចសហប្រតិបត្តិការលើវិស័យផ្សេងៗ និងអនុវត្តនូវអ្វីដែលថ្នាក់ដឹកនាំប្រទេសទាំងពីរបានឯកភាពគ្នាពីឆ្នាំ២០១៨ ជាពិសេសគោលដៅបង្កើនពាណិជ្ជកម្មទ្វេភាគីឱ្យដល់ ១ពាន់លានដុល្លារអាមេរិក។

ពាក់ព័ន្ធនិងវិស័យពាណិជ្ជកម្ម និងវិនិយោគ ភាគីទាំងពីរ បានយល់ស្របគ្នាលើការបង្កើតជើងហោះហើរត្រង់រវាងកម្ពុជា និងតួកគី។

ក្នុងនោះ ភាគីតួកគី នឹងជំរុញឱ្យក្រុមហ៊ុនអាកាសចរណ៍តួកគីហោះហើរត្រង់ទៅកម្ពុជាឱ្យបានឆាប់បំផុត ដើម្បីសម្រួលដល់ការធ្វើពាណិជ្ជកម្ម វិនិយោគ និងទេសចរណ៍។

ក្រៅពីទស្សនកិច្ចផ្លូវការខាងលើ លោក សុខ ចិន្តាសោភា មានជំនួបដាច់ដោយឡែកជាមួយក្រុមហ៊ុនតួកគីចំនួន ០៣ ដែលមានបំណងពង្រីកអាជីវកម្មមកកម្ពុជា។

គួរបញ្ជាក់ដែរថា កន្លងមក កម្ពុជា និងតួកគី ធ្លាប់បានចុះកិច្ចព្រមព្រៀងស្ដីពីការបញ្ចៀសការយកពន្ធត្រួតគ្នា (DTA) ដែលជាយន្តការមួយជួយសម្រួលដល់វិនិយោគិនបរទេស និងការបន្ធូរបន្ថយការយកពន្ធមួយចំនួន។ (អានបន្ថែម)

- Video Advertisement -