កម្ពុជា ថៃ បានសម្រេចកសាងស្ពានព្រំដែនមិត្តភាពរួមគ្នា

• Proeksa Meas
• 1 ខែ​កុម្ភៈ 2017
• Uncategorized
• 366 មើល

រាជាណាចក្រកម្ពុជា និងថៃ បានឈានទៅដល់កិច្ចព្រមព្រៀងក្នុងការកសាងស្ពានមិត្តភាពនៃព្រំដែនប្រទេសទាំង ២ រវាងប៉ោយប៉ែត និងអារញ្ញប្រថេត ដើម្បីសំរួលដល់ការធ្វើចរាចរ។

កិច្ចព្រមព្រៀងនេះជាផ្នែកមួយនៃគម្រោងដឹកជញ្ជូនពីរ ដែលប្រទេសទាំងពីរបានសម្រេចយល់ព្រមនៅក្នុងជំនួបពិភាក្សាលើកទី ៥ នៃមហាអនុតំបន់ទន្លេមេគង្គ ស្តីពីកិច្ចប្រឹងប្រែងក្នុងការសម្រួលការដឹកជញ្ជូនឆ្លងកាត់ព្រំដែន ដែលបានប្រព្រឹត្តទៅនៅខេត្តឈៀងម៉ៃ ព្រះរាជាណាចក្រថៃ កាលថ្ងៃទី ១៦ ខែធ្នូ កន្លងទៅនេះ។

ស្ពានឆ្លងកាត់ព្រំដែននេះ នឹងត្រូវកសាងឡើង រវាងស្រុកស្ទឹងបត់ និងស្រុកបាននុងអាន។ ប្រទេសថៃ នឹងផ្តល់ជាជំនួយដើម្បីកសាងស្ពាន ផ្នែកខាងប្រទេសកម្ពុជា ក៏ដូចជាកម្ចីដើម្បីកសាងបុស្តិ៍ត្រួតពិនិត្យនៃច្រកព្រំដែនថ្មីនេះផងដែរ នេះបើយោងតាមក្រសួងសាធារណការ និងដឹកជញ្ជូនកម្ពុជា។

ប្រទេសថៃ នឹងកសាងផងដែរនូវផ្លូវពីច្រកព្រំដែននេះ ទៅផ្លូវជាតិលេខ ៥ ដែលត្រូវបានគេស្គាល់ថា ជាផ្លូវអន្តរជាតិអាស៊ានលេខ ១៕