កម្ពុជា-ឥណ្ឌា ប្តេជ្ញារួមគ្នាសង់ប្រព័ន្ធទឹក និងអភិវឌ្ឍស្តង់ដាគំរូ នៅតាមសាលារៀនក្នុងខេត្តចំនួន២

• Sommana Yan
• 8 ខែ​តុលា 2025
• ព័ត៌មានក្នុងស្រុក
• 130 មើល

ក្រសួងអប់រំ យុវជន និងកីឡា និងស្ថានទូតឥណ្ឌាប្រចាំកម្ពុជា បានសម្រេចចុះហត្ថលេខាលើអនុស្សារណៈយោគយល់គ្នាស្តីពី “កម្មវិធីជំនួយឥតសំណងរបស់ឥណ្ឌាសម្រាប់ការអនុវត្តគម្រោងផលប៉ះពាល់រហ័ស Quick Impact Project (QIP) នៅកម្ពុជា” សំដៅរួមគ្នាសាងសង់ប្រព័ន្ធទឹក និងអភិវឌ្ឍស្តង់ដាគំរូ នៅតាមសាលារៀនក្នុងខេត្តកំពង់ចាម និងពោរិ៍សាត់។

MoU នេះ បានធ្វើឡើង នៅថ្ងៃទី១ ខែតុលា ឆ្នាំ២០២៥ ក្រោមវត្តមាន ឯកឧត្ដម ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងឯកឧត្តម Vanlalvawna Bawitlung ឯកអគ្គរដ្ឋទូតឥណ្ឌាប្រចាំកម្ពុជា។
MoU ខាងលើ គឺផ្តោតលើគម្រោងចំនួន២រួមមាន៖ គម្រោងទី១៖ ការរៀបចំប្រព័ន្ធទឹកនៅក្នុងសាលារៀនឆ្លើយតបទៅនឹងភាពធន់នៃអាកាសធាតុ (Climate Resilient School Water System) ឆ្នាំ២០២៥-២០២៦ ដោយនឹងសាងសង់ប្រព័ន្ធទឹកដែលប្រើប្រាស់ថាមពលព្រះអាទិត្យ (Solar energy-based standard school water system) នៅក្នុងសាលាចំនួន៦ នៅក្នុងខេត្តពោធិ៍សាត់។
គម្រោងទី២៖ ការអភិវឌ្ឍសាលាស្តង់ដាគំរូ (Standard Model School Development) ឆ្នាំ២០២៥- ២០២៦ ដោយនឹងសាងសង់បង្គន់អនាម័យដែលមានកន្លែងលាងសម្អាតដៃចំនួន១បង្គន់, សាងសង់ប្រព័ន្ធទឹកដែលប្រើប្រាស់ថាមពលព្រះអាទិត្យចំនួន១, សង់បន្ទប់កុំព្យូទ័រចំនួន១ នៅក្នុងខេត្តកំពង់ចាម។

ក្រសួងអប់រំ និងស្ថានទូតឥណ្ឌា អះអាងថា តាមរយៈកិច្ចសហប្រតិបត្តិការនេះ នឹងចូលរួមចំណែកយ៉ាងសំខាន់ដល់ការអភិវឌ្ឍវិស័យអប់រំនៅកម្ពុជា ជាពិសេសក្នុងការកសាងធនធានមនុស្សប្រកបដោយគុណភាព ឆ្លើយតបនឹងចក្ខុវិស័យរបស់រាជរដ្ឋាភិបាល៕

• infrastructure development