ក្រសួងពង្រឹងកិច្ចសហប្រតិបត្តិការយុទ្ធសាស្ត្រជាមួយ CRDC និង CIDCA លើគម្រោងហេដ្ឋារចនាសម្ព័ន្ធ និងផ្លូវដែក

Proeksa Meas
8 ខែវិច្ឆិកា 2026
ព័ត៌មានសំណង់
12 មើល

ភាពជាដៃគូអភិវឌ្ឍន៍ជាមួយប្រទេសចិនក្នុងការជំរុញការតភ្ជាប់គម្រោងស្ពាន ផ្លូវថ្នល់ និងការបណ្តុះបណ្តាលធនធានមនុស្សឆ្ពោះទៅចក្ខុវិស័យឆ្នាំ២០៥០

រាជធានីភ្នំពេញ៖ កិច្ចខិតខំប្រឹងប្រែងក្នុងការអភិវឌ្ឍហេដ្ឋារចនាសម្ព័ន្ធរូបវន្ត និងប្រព័ន្ធដឹកជញ្ជូននៅកម្ពុជាត្រូវបានជំរុញ តាមរយៈកិច្ចប្រជុំពិភាក្សាការងាររវាង ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងគណៈប្រតិភូក្រុមហ៊ុនសាជីវកម្មរចនាផ្លូវដែកនៃប្រទេសចិន (China Railway Design Corporation – CRDC) ព្រមទាំងទីភ្នាក់ងារសហប្រតិបត្តិការអន្តរជាតិចិនសម្រាប់អភិវឌ្ឍន៍ (CIDCA)។ នេះបើយោងតាមជំនួបកាលពីថ្ងៃទី៣០ ខែតុលា ឆ្នាំ២០២៦ នៅទីស្តីការក្រសួង ដោយមានការដឹកនាំគណៈប្រតិភូដោយលោក Xue Dong អគ្គទីប្រឹក្សាស្ថានទូតចិនប្រចាំកម្ពុជា ព្រមទាំងមានការចូលរួមពីថ្នាក់ដឹកនាំ និងមន្ត្រីជំនាញជាច្រើនរូប។

កិច្ចប្រជុំនេះត្រូវបានរៀបចំឡើងក្នុងគោលបំណងពិនិត្យ និងពិភាក្សាស៊ីជម្រៅលើការសិក្សាលទ្ធភាពគម្រោងអាទិភាពជាច្រើន រួមមានគម្រោងសាងសង់ស្ពាន ផ្លូវថ្នល់ ប្រព័ន្ធទឹកកខ្វក់ និងជាពិសេសគម្រោងអភិវឌ្ឍន៍ប្រព័ន្ធផ្លូវដែក។ ក្រៅពីគម្រោងសាងសង់ហេដ្ឋារចនាសម្ព័ន្ធ ភាគីទាំងពីរបានផ្តោតការយកចិត្តទុកដាក់យ៉ាងខ្លាំងផងដែរលើការអភិវឌ្ឍធនធានមនុស្សសម្រាប់មន្ត្រីជំនាញរបស់ក្រសួង តាមរយៈកម្មវិធីបណ្តុះបណ្តាលផ្នែកបច្ចេកទេសទាំងនៅក្នុងស្ថាប័នផ្ទាល់ និងការបញ្ជូនមន្ត្រីបណ្តុះបណ្តាលនៅប្រទេសចិន។

ក្នុងឱកាសនោះ ភាគីកម្ពុជាបានថ្លែងអំណរគុណយ៉ាងជ្រាលជ្រៅចំពោះការគាំទ្រឥតលក្ខខណ្ឌពីសំណាក់រដ្ឋាភិបាល និងមិត្តចិន ក្នុងការចូលរួមចំណែកសាងសង់ហេដ្ឋារចនាសម្ព័ន្ធដែលជាកាតាលីករជំរុញកំណើនសេដ្ឋកិច្ច-សង្គមរបស់កម្ពុជា។ កិច្ចខិតខំប្រឹងប្រែងទាំងនេះគឺស្របគ្នាទៅនឹង «ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងព័ស្តុភារកម្មកម្ពុជា ២០២៣-២០៣៣» និងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា។ ក្រសួងសាធារណការ និងដឹកជញ្ជូននៅតែប្តេជ្ញាចិត្តខ្ពស់ក្នុងការលើកកម្ពស់គុណភាពសេវា និងការតភ្ជាប់ប្រព័ន្ធដឹកជញ្ជូនឱ្យមានគុណភាព សុវត្ថិភាព ចីរភាព និងបរិយាបន្ន ឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់។

កិច្ចសហប្រតិបត្តិការដ៏ជិតស្និទ្ធរវាងក្រសួងសាធារណការ និងដឹកជញ្ជូន ជាមួយសាជីវកម្មរចនាផ្លូវដែកចិន និងទីភ្នាក់ងារ CIDCA គឺជាគ្រឹះដ៏រឹងមាំក្នុងការកសាងហេដ្ឋារចនាសម្ព័ន្ធដឹកជញ្ជូនជាតិឱ្យកាន់តែទំនើប និងមានប្រសិទ្ធភាពខ្ពស់។ ការពង្រីកវិសាលភាពហេដ្ឋារចនាសម្ព័ន្ធផ្លូវដែក ស្ពាន ផ្លូវថ្នល់ ជាមួយការបណ្តុះបណ្តាលធនធានមនុស្សប្រកបដោយវិជ្ជាជីវៈ នឹងជួយពង្រឹងសក្តានុពលសេដ្ឋកិច្ចជាតិ និងធានាបាននូវការអភិវឌ្ឍប្រកបដោយចីរភាពស្របតាមចក្ខុវិស័យអភិវឌ្ឍន៍រយៈពេលវែងរបស់កម្ពុជា។ (អានបន្ថែម)