កំពង់ផែលំដាប់អន្តរជាតិ នៅគិរីសាគរ-កោះកុង នឹងដាក់ដំណើរការដើមឆមាសទី២ឆ្នាំនេះ

• Sommana Yan
• 9 ខែ​ឧសភា 2023
• ព័ត៌មានក្នុងស្រុក
• 292 មើល

កំពង់ផែ​សមុទ្រ​លំ​​ដាប់​អន្តរជាតិ​ទី​១ នៅ​ខេត្តកោះកុង​ដែល​វិនិយោគ​ដោយ​ក្រុមហ៊ុនឯកជន គ្រោង ​បើក​ដំណើរការ​នៅ​ពាក់កណ្តាលឆ្នាំនេះ ខណៈរដ្ឋបាលខេត្តកំពុងពិនិត្យនីតិវិធី ក្នុងការដាក់ដំណើរការកំពង់ផែ។

លោកស្រី អ៊ី នារីនេត អភិបាលរង នៃគណៈអភិបាលខេត្តកោះកុង បានដឹកនាំកិច្ចប្រជុំ ជាមួយក្រុមហ៊ុន កាលពីដើមខែឧសភា ដើម្បីពិនិត្យនីតិវិធី ក្នុងការដាក់ដំណើរការកំពង់ផែឱ្យស្របតាមច្បាប់វិនិយោគរបស់ប្រទេសកម្ពុជា និងបន្តសហការ ជាមួយក្រុមហ៊ុន ដើម្បីរៀបចំសំណើរទៅក្រសួងពាក់ព័ន្ធ និងទីស្តីការគណៈរដ្ឋមន្រ្តី។

លោកស្រី​លើកឡើងថា ៖ “រដ្ឋបាលខេត្ត នឹងរៀបចំលិខិតគាំទ្រ ដើម្បីបើកដំណើរការជាផ្លូវការរបស់កំពង់ផែអន្តរជាតិតារាសាគរ”។

វិនិយោគដោយក្រុមហ៊ុន Koh Kong Port Management កំពង់ផែនេះ ស្ថិតនៅក្នុង​ឃុំ​កោះ​ស្តេច ស្រុក​គិរីសាគរ ខេត្តកោះកុង និងមាន​សមត្ថភាព​ផ្ទុក និង​ផ្ទេរ​ទំ​​និ​ញ​រាប់ម៉ឺន​តោន​ក្នុង ​១ ​ឆ្នាំៗ​។​

ជាមួយគ្នានេះដែរ លោកជំទាវ មិថុនា ភូ​ថង អភិបាលខេត្ត​កោះកុងក៏បានបញ្ជាក់ដូចគ្នានេះដែរថា កំពង់ផែសមុទ្រលំដាប់អន្តរជាតិទី១ (តារាសាគរ) នៅខេត្តកោះកុង គ្រោងបើកដំណើរការនៅដើមឆមាសទី២ ឆ្នាំ២០២៣។ នេះបើយោងតាមការចុះផ្សាយដោយកាសែត ភ្នំពេញ ប៉ុស្តិ៍ នៅថ្ងៃទី៥ ខែឧសភា ២០២៣។

• Road and Infrastructure
• Projects Development