ក្រុមហ៊ុន Aecom ទទួលបានការគ្រប់គ្រងប្រព័ន្ធលើខ្សែផ្លូវរថភ្លើងម៉ាឡេស៊ី

• Proeksa Meas
• 3 ខែ​កុម្ភៈ 2018
• ព័ត៌មានសំណង់
• 214 មើល

ក្រុមហ៊ុនវិស្វកម្មអាមេរិក Aecom ត្រូវបានជ្រើសរើសដោយក្រុមហ៊ុនចិន China Communications Construction Company (CCCC) ឲ្យត្រួតពិនិត្យមើលការដ្ឋានសាងសង់គម្រោងផ្លូវដែក East Coast Rail Link (ECRL) តម្លៃ ១៣ប៊ីលានដុល្លារនៅប្រទេសម៉ាឡេស៊ី។

នៅក្នុងសេចក្តីប្រកាសព័ត៌មាន Aecom បានលើកឡើងថា ក្រុមហ៊ុននឹងមើលលើស្ថានីយរថភ្លើង ស្ពានផ្លូវដែក ផ្លូវដែករូងក្រោមដី និងឃ្លាំងទាំងអស់របស់គម្រោងដែលទាក់ទងនឹងការសាងសង់ខ្សែរថភ្លើងស្តង់ដារដើរដោយអគ្គិសនីនេះ ពីកំពង់ផែ Port Klang នៅភាគអាគ្នេយ៍នៃឧបទ្វីបម៉ាឡេស៊ីកាត់តាមទីក្រុងគូឡាឡាំពួរទៅក្រុង Pengkalan Kubor នៅព្រំដែនភាគឦសានជាប់ប្រទេសថៃ។

គម្រោងផ្លូវដែក ECRL គឺជាផ្នែកមួយនៃផែនការដឹកជញ្ជូនថ្នាក់ជាតិរបស់ម៉ាឡេស៊ី។ ការសាងសង់បានចាប់ផ្តើមកាលពីខែសីហាឆ្នាំមុន ហើយគ្រោងនឹងបញ្ចប់នៅឆ្នាំ២០២៤។ នៅពេលបញ្ចប់ការសាងសង់ ខ្សែផ្លូវរថភ្លើងនេះនឹងភ្ជាប់ទីក្រុងសំខាន់ៗនៅឆ្នេរសមុទ្រខាងកើតរបស់ម៉ាឡេស៊ីទៅនឹងបណ្តាញផ្លូវដែកសំខាន់ៗរបស់ប្រទេស។

ខ្សែផ្លូវរថភ្លើងប្រវែង ៦៨៨គីឡូម៉ែត្រនេះត្រូវបានគេរំពឹងថានឹងដឹកអ្នកដំណើរ ៥.៤លាននាក់នៅឆ្នាំ២០៣០។ រថភ្លើងនឹងមានល្បឿនអតិបរមា ១៦០គីឡូម៉ែត្រក្នុងមួយម៉ោង។