ក្រុមហ៊ុន Vingroup ចាប់ផ្តើមការងារលើរោងចក្រផលិតរថយន្ត

• Proeksa Meas
• 2 ខែ​វិច្ឆិកា 2017
• ព័ត៌មានសំណង់
• 210 មើល

វៀតណាម៖ ក្រុមហ៊ុនអភិវឌ្ឍន៍អចលនទ្រព្យធំបំផុតរបស់វៀតណាម Vingroup កាលពីខែកញ្ញា បានប្រកាសថា ខ្លួនបានចាប់ផ្តើមសាងសង់រោងចក្រផលិតរថយន្តដ៏ធំមួយនៅភាគខាងជើងនៃប្រទេស។

ដំណាក់កាលទី១ នៃការសាងសង់លើផ្ទៃដីទំហំ ៣៣៥ហិកតា មានតម្លៃ ១ ទៅ ១.៥ប៊ីលានដុល្លារ ហើយវាជាផ្នែកមួយនៃការជម្រុញជារួមរបស់ក្រុមហ៊ុនដើម្បីពង្រីកវិស័យឧស្សាហកម្មធុនធ្ងន់នៅវៀតណាម។ ក្រុមហ៊ុននេះបានខ្ចីប្រាក់ចំនួន ៨០០លានដុល្លារ ពី Credit Suisse AG ដើម្បីផ្តល់មូលនិធិដល់ដំណាក់កាលទី១នេះ។

តាមរយៈការសាងសង់រោងចក្រផលិតរថយន្តដ៏ធំនេះ ក្រុមហ៊ុនសង្ឃឹមថានឹងក្លាយជាក្រុមហ៊ុនផលិតយានយន្តឈានមុខគេនៅអាស៊ីអាគ្នេយ៍។

ផែនការរបស់ក្រុមហ៊ុនមានការផលិតម៉ូតូអេឡិចត្រូនិកដំបូងនៅឆ្នាំទី១ ហើយផលិតរថយន្តនៅឆ្នាំទី២រហូតឈានដល់ការផលិតពី ១០០.០០០ ទៅ ២០០.០០០គ្រឿង។ ក្រុមហ៊ុន Vingroup បានប្រាប់សារព័ត៌មាន Reuters ថា ពួកគេមានបំណងផលិតរថយន្ត ៥០០.០០០គ្រឿងក្នុងមួយឆ្នាំ នៅឆ្នាំ ២០២៥។