ចិន ចង់ផ្សារភ្ជាប់បច្ចេកវិទ្យាអ៊ីនធឺណិត ជាមួយសហគ្រាសនៅកម្ពុជា ដើម្បីផ្ទេរចំណេះដឹង និងពង្រឹងភាពជាដៃគូ

Sommana Yan
22 ខែមករា 2025
ព័ត៌មានក្នុងស្រុក
102 មើល

នៅក្នុងជំហានដ៏សំខាន់មួយឆ្ពោះទៅរកកិច្ចសហការផ្នែកបច្ចេកវិទ្យា ប្រទេសចិនមានបំណងចង់ភ្ជាប់វិស័យបច្ចេកវិទ្យាអ៊ីនធឺណិតដែលកំពុងរីកចម្រើនខ្លាំងនៅក្នុងខេត្តគ្វីចូវរបស់ខ្លួនជាមួយសហគ្រាសធនតូច និងមធ្យមនៅកម្ពុជា ក្នុងគោលបំណងលើកកម្ពស់ការផ្ទេរចំណេះដឹង និងជំរុញភាពជាដៃគូដ៏រឹងមាំ។

គំនិតផ្តួចផ្តើមនេះត្រូវបានលើកឡើងក្នុងជំនួបនាពេលថ្មីៗនេះរវាងឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍របស់កម្ពុជា និងលោក Yu Junfang ប្រធានសមាគមអ៊ីនធឺណិត Guizhou នៅថ្ងៃទី ១៦ ខែមករា ឆ្នាំ២០២៥។

លោក Yu Junfang បានដឹកនាំគណៈប្រតិភូមកពីសមាគមអ៊ិនធឺណិតខេត្ត Guizhou ដែលជាមជ្ឈមណ្ឌល ដែលមានបទពិសោធន៍ផ្នែកបច្ចេកវិទ្យាប្រកបដោយជោគជ័យក្នុងវិស័យនានា រួមទាំងទេសចរណ៍ ការថែទាំសុខភាព និងសេដ្ឋកិច្ចឌីជីថល បាននាំយកនូវចក្ខុវិស័យដើម្បីធ្វើការផ្លាស់ប្តូរបរិយាកាសធុរកិច្ចប្រកបដោយថាមពលសម្រាប់កម្ពុជា។ ក្នុងរយៈពេលត្រឹមតែមួយទសវត្សរ៍ប៉ុណ្ណោះ ខេត្តគ្វីចូវ (Guizhou) បានវិវត្តន៍ពីតំបន់ដែលមិនសូវមានការអភិវឌ្ឍន៍ទៅជាមជ្ឈមណ្ឌលនវានុវត្តន៍ត្រួសត្រាយផ្លូវ ដែលជំរុញដោយភាពជឿនលឿននៃបច្ចេកវិទ្យា AI និង 5G តាមរយៈការធ្វើទំនើបកម្មឧស្សាហកម្មរបស់ខ្លួន។

គួរបញ្ជាក់ថា ចំណុចសំខាន់នៃកិច្ចពិភាក្សានេះ គឺសំណើបង្កើតកម្មវិធីផ្គូផ្គងអាជីវកម្មដែលជំរុញភាពជាដៃគូរវាងក្រុមហ៊ុនបច្ចេកវិទ្យាចិន និងសហគ្រាសធុនតូច និងមធ្យម (SMEs) របស់កម្ពុជា។ គំនិតផ្តួចផ្តើមនេះមានគោលបំណងផ្តល់សិទ្ធិអំណាចដល់ធុរកិច្ចកម្ពុជាជាមួយនឹងជំនាញ និងចំណេះដឹងផ្នែកបច្ចេកវិទ្យាសំខាន់ៗ ដែលមានសារៈសំខាន់សម្រាប់ការធ្វើពិពិធកម្មប្រទេស និងជំរុញផលិតភាពក្នុងទីផ្សារប្រកួតប្រជែងកាន់តែខ្លាំងឡើង។

លើសពីនេះលោក Yu Junfang ក៏បានបង្ហាញនូវផែនការក្នុងការដាក់ចេញនូវគំនិតផ្តួចផ្តើមផ្នែកបច្ចេកវិទ្យារួមគ្នាជាមួយសមភាគីកម្ពុជា ដែលអាចបង្ហាញខ្លួនជាលើកដំបូងក្នុងទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទីបីដែលនឹងប្រព្រឹត្តទៅនៅថ្ងៃទី២៦ ខែមីនា ឆ្នាំ២០២៥។

រដ្ឋមន្ត្រី ហែម វណ្ណី បានស្វាគមន៍យ៉ាងកក់ក្តៅចំពោះការប្តេជ្ញាចិត្តរបស់សមាគមក្នុងការកៀងគរសហគ្រាសធុនតូច និងមធ្យមចិន ឱ្យមកធ្វើជាដៃគូក្នុងការបង្កើតដំណោះស្រាយបច្ចេកវិទ្យាសម្រាប់កម្ពុជា។ កិច្ចសហការនេះកំពុងដើរស្របគ្នានឹងបំណងប្រាថ្នារបស់កម្ពុជាក្នុងការទទួលយកបច្ចេកវិទ្យាទំនើប និងលើកកម្ពស់ទេសភាពឧស្សាហកម្មរបស់ខ្លួន។

នៅពេលដែលប្រទេសកម្ពុជាសម្លឹងឆ្ពោះទៅរកអនាគតប្រកបដោយភាពច្នៃប្រឌិត ភាពជាដៃគូនេះអាចដើរតួនាទីយ៉ាងសំខាន់ក្នុងការផ្លាស់ប្តូរសេដ្ឋកិច្ចរបស់ខ្លួន និងទាញយកសក្តានុពលនៃវឌ្ឍនភាពឌីជីថល។