ឆ្នាំ២០២៥៖ វិស័យហេដ្ឋារចនាសម្ព័ន្ធកម្ពុជា ទទួលបានទុនវិនិយោគរហូត ៣,៨ប៊ីលានដុល្លារអាម៉េរិក

webmaster@construction-property.com
4 ខែមីនា 2026
ព័ត៌មានសំណង់
1181 មើល

នៅឆ្នាំ២០២៥ កម្ពុជាមានទុនវិនិយោគសរុបប្រមាណ ១០ប៊ីលាន ដុល្លារអាម៉េរិក ហើយក្នុងនោះវិស័យហេដ្ឋារចនាសម្ព័ន្ធកម្ពុជា ទទួលបានទុនវិនិយោគរហូត ៣,៨ប៊ីលានដុល្លារអាមេរិក។

នេះបើយោងតាមរបាយការណ៍វឌ្ឍនភាពប្រចាំឆ្នាំ២០២៥ ស្តីពីការអនុវត្តផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដែលផ្សាយដោយក្រសួងសាធារណការ និងដឹកជញ្ជូន កាលពីថ្ងៃទី២៥ ខែកុម្ភៈ ឆ្នាំ២០២៦។

ប្រភពដដែលបានឱ្យដឹងថា នៅឆ្នាំ២០២៥ កម្ពុជាមានទុនវិនិយោគសរុបប្រមាណ ១០ប៊ីលាន ដុល្លារអាម៉េរិក ខណៈវិស័យហេដ្ឋារចនាសម្ព័ន្ធកម្ពុជាទទួលបានទុនវិនិយោគរហូត ៣,៨ប៊ីលានដុល្លារ។ ក្នុងនោះប្រភពទុនវិនិយោគឈានមុខ រួមមាន៖ ប្រទេសចិន ដែលនាំមុខក្នុងការវិនិយោគ (៥៤,២៥%) បន្ទាប់មកគឺទុនវិនិយោគក្នុងស្រុក (៣១,២៧%) ហើយសិង្ហបុរី (៥,៩៩%) វៀតណាម (៤,១០%) និងប្រភពវិនិយោគពីប្រទេសផ្សេងៗទៀត។

នៅក្នុងរបាយការណ៍នោះ បានបញ្ជាកដែរថា ទំហំពាណិជ្ជកម្មអន្តរជាតិរបស់ប្រទេសកម្ពុជាក្នុងឆ្នាំ២០២៥ សម្រាប់ការនាំចេញសរុបមាន ចំនួនប្រមាណ ៣០ ០២១ លានដុល្លារអាម៉េរិក (កើនឡើង ១២,២២% បើធៀបឆ្នាំ២០២៤ ប្រមាណ ២៦ ៧៥២ លានដុល្លារអាម៉េរិក) ខណៈដែលការនាំចូលសរុបមានចំនួនប្រមាណជា ៣៥ ៤១៩ លានដុល្លារអាម៉េរិក (កើនឡើង ១៣,៣៥% បើធៀបឆ្នាំ២០២៤ ប្រមាណ ៣១ ២៤៧លានដុល្លារអាម៉េរិក)។

ក្នុងនោះ ឆ្នាំ២០២៥ ការនាំចូលទំនិញរបស់កម្ពុជា តាមរយៈប្រព័ន្ធដឹកជញ្ជូនផ្លូវអាកាស មានរហូត៦១% ខណៈការនាំចេញរបស់កម្ពុជាតាមផ្លូវអាកាសវិញ គឺមានប្រមាណ ៣៣% ផងដែរ៕