តើមានការឈានដល់ដំណោះស្រាយចំពោះអគារ Gold Tower 42 ឬនៅ?

• Proeksa Meas
• 6 ខែ​ធ្នូ 2016
• Uncategorized
• 291 មើល

ក្រុមហ៊ុនអភិវឌ្ឍអគារ Gold Tower 42 Yon Woo Co. Ltd បានអះអាងចំពោះវិនិយោគិនជាលើកទីបួនក្នុងរយៈពេលដប់ឆ្នាំមកនេះថា ក្រុមហ៊ុននឹងបញ្ចប់ការសាងសង់គម្រោងអគារដែលមានភាពចម្រូងចម្រាស់បំផុតក្នុងរាជធានីភ្នំពេញនេះ។

អ្នកតំណាងផ្នែកច្បាប់របស់ក្រុមហ៊ុនកូរ៉េ HBS បានទាក់ទងវិនិយោគិនទាំងអស់ដើម្បីអញ្ជើញពួកគេឲ្យចូលរួមកិច្ចប្រជុំមួយដើម្បីពិភាក្សាអំពីអចលនទ្រព្យរបស់ខ្លួន ដោយធ្វើការផ្តល់ជាជម្រើសបន្តការរក្សាទុកអចលនទ្រព្យនេះ ឬលក់ទៅឲ្យក្រុមហ៊ុនអភិវឌ្ឍន៍ នេះបើតាមសេចក្តីរាយការណ៍ក្នុងភ្នំពេញប៉ុស្តិ៍។

ការធានាអះអាងរបស់ក្រុមហ៊ុន Yon Woo Co ធ្វើឡើងដើម្បីឆ្លើយតបទៅនឹងការអន្តរាគមន៍ដោយផ្ទាល់ពីរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ឯកឧត្តម ជា សុផារ៉ា នៅក្នុងខែតុលា ដែលបានទាមទារឲ្យមានការជូនដំណឹងពីផែនការបញ្ចប់ការសាងសង់អគារនេះ។

បើទោះបីជាភាពមិនទុកចិត្តនៅតែមានខ្ពស់ក្នុងចំណោមវិនិយោគិន អ្នកជំនាញយល់ដូចគ្នាថា ប្រសិនបើគម្រោងនេះត្រូវបានបញ្ចប់នោះ វានឹងមិនមានបញ្ហាសម្រាប់ការលក់ចេញនោះទេ ក៏ព្រោះតែទីតាំងដ៏ពិសេស របស់អគារនេះ។