ត្រឹមឆ្នាំ២០២៤នេះ កម្ពុជាបណ្តុះ និងដាំកូនឈើឡើងវិញបានជាង២០លានដើម

• Sommana Yan
• 10 ខែ​កក្កដា 2024
• Uncategorized @km
• 190 មើល

ត្រឹមឆ្នាំ២០២៤នេះ រដ្ឋបាលព្រៃឈើបានបណ្តុះ និងដាំកូនឈើ បានរហូតជាង២០,៥០លានដើម ជាមួយនិងសមត្ថភាពបណ្តុះកូនឈើ ដើម្បីដាំ និងចែក ចំនួន៥០ម៉ឺនដើមក្នុងមួយឆ្នាំ។

នេះបើតាមប្រសាសន៍របស់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ថ្លែងក្នុងពិធីរុក្ខទិវា៩កក្កដា ឆ្នាំ២០២៤ ប្រារព្ធឡើងនៅខេត្តតាកែវ។

នាឱកាសនោះ ឯកឧត្តម ឌិត ទីណា បានឱ្យដឹងថា ត្រឹមឆ្នាំ២០២៤នេះ រដ្ឋបាលព្រៃឈើបានបណ្តុះ និងដាំកូនឈើបានជាង ២០,៥០លានដើម តាមរយៈថវិការដ្ឋ ជាមួយនឹងសមត្ថភាពបណ្តុះកូនឈើដើម្បីដាំ និងចែកចំនួន៥០ម៉ឺនដើមក្នុងមួយឆ្នាំ ខណៈដែលកូនឈើជាច្រើនលានដើមផ្សេងទៀត ត្រូវបានបណ្តុះ និងដាំដោយប្រជាពលរដ្ឋជាលក្ខណៈឯកជន ដោយមិនរាប់បញ្ចូលឈើហូបផ្លែ ឬដំណាំឧស្សាហកម្មផ្សេងៗទៀតឡើយ។

ជាមួយគ្នានេះ ឯកឧត្តមថា ក្នុងឆ្នាំ២០២៤ នេះដែរ រដ្ឋបាលព្រៃឈើនៃក្រសួងកសិកម្ម ក៏ទើបបានបញ្ចប់ការដាំកូនឈើចម្រុះចំនួន ១៦.៥០០ដើម នៅលើផ្ទៃដីទំហំ ១០ហិកតាផ្សេងទៀត នៅស្ថានីយផ្សព្វផ្សាយ និងស្តារព្រៃឈើសុក្រម ក្នុងឃុំសំរោង ស្រុកភ្នំក្រវ៉ាញ ខេត្តពោធិ៍សាត់ផងដែរ។

បើតាមក្រសួងកសិកម្ម បានបញ្ជាក់ថា សម្រាប់អបអរពិធីរុក្ខទិវា៩កក្កដា ឆ្នាំ២០២៤ កូនឈើធ្នង់ គ្រញូង និងក្ងោកសរុបចំនួន ៣០០០ដើម ត្រូវបានដាំនៅលើដីមានទំហំ ៣ហិកតា មានទីតាំងនៅស្ថានីយផ្សព្ធផ្សាយ និងស្តារព្រៃឈើបន្ទាយអង្គរ ក្នុងភូមិខ្នា ស្រុកត្រាំកក់ ខេត្តតាកែវ។

ដោយឡែក បើគិតត្រឹមឆ្នាំ២០២៤នេះ ពិធីរុក្ខទិវាបានបង្កើតជាសួនរុក្ខទិវាសរុបទំហំ ៤៧៥ហិកតា នៅតាមបណ្តារាជធានី-ខេត្តចំនួន១៤ ហើយព្រឹត្តិការណ៍រុក្ខទិវាក៏បានបង្កើតជាចលនាស្រឡាញ់ព្រៃឈើ និងដាំកូនឈើជាច្រើនផ្សេងទៀតនៅទូទាំងប្រទេស ដោយបានបង្កើតជាចម្ការឈើជាង ៨ម៉ឺនហិកតា និងសួនសាធារណៈ ឬឯកជនជាច្រើន នៅតាមសាលារៀន វត្តអារាម រមណីយដ្ឋាន និងសួនឯកជននានា៕

• Energy and Environment