បារាំងគ្រោងសង់សារមន្ទីរមួយនៅជិតប្រាសាទកោះកេរ្តិ៍ ដើម្បីទាក់ទាញភ្ញៀវទេសចរ

Sommana Yan
21 ខែឧសភា 2024
ព័ត៌មានក្នុងស្រុក
167 មើល

បារាំង គ្រោងសាងសង់សារមន្ទីរមួយនៅជិតប្រាសាទកោះកេរ្តិ៍ ដើម្បីទាក់ទាញភ្ញៀវទេសចរ ទៅទស្សនាទាំងប្រាសាទ និងទៅមើលសារមន្ទីរ។ នេះបើតាមការលើកឡើងរបស់ឯកឧត្តម M. Vincent ÉBLÉ សមាជិកព្រឹទ្ធសភាប្រចាំតំបន់ Seine-et-Marne (Île-de-France) និងជាប្រធានក្រុមមិត្តភាពបារាំង-កម្ពុជា ក្នុងជំនួបពិភាក្សាការងារជាមួយសម្ដេចតេជោ ហ៊ុន សែន នៅថ្ងៃទី១៧ ខែឧសភា ឆ្នាំ២០២៤។

ក្នុងជំនួបនេះ ឯកឧត្តម M. Vincent ÉBLÉ បានជូនយោបល់ទៅសម្តេចថា គួរជំរុញលើកទឹកចិត្តឱ្យមានទេសចរណ៍ ចូលមកទស្សនាកម្ពុជា ដោយរៀបចំឱ្យភ្ញៀវទេសចរស្នាក់នៅបានយូរ ដែលអាចរៀបចំជាសារមន្ទីរ។

ឯកឧត្តមបានបន្តថា ឯកឧត្តមបានជួបជជែកជាមួយលោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្បៈ ហើយលោកមានគម្រោងនឹងកសាងសារមន្ទីរមួយនៅក្បែរប្រាសាទកោះកេរ្តិ៍ ដើម្បីភ្ញៀវទេសចរណ៍ បានទៅមើលប្រាសាទផង និងទៅមើលសារមន្ទីរផង។

ក្រៅពីការលើកឡើងនេះ ឯកឧត្តម M. Vincent ÉBLÉ ស្នើសុំរក្សាតុល្យភាពនៃការថែរក្សាបេតិកភណ្ឌជាតិ ដូចជាអគារចាស់ៗដែលត្រូវយកចិត្តទុកដាក់ថែរក្សា ជាមួយនឹងការកសាងនូវអគារថ្មីៗទំនើបៗ។

ជាការឆ្លើយតប សម្ដេចតេជោ បានបញ្ជាក់ថា យើងត្រូវស្វែងរកតុល្យភាពក្នុងការរក្សាអគារចាស់ៗ និងកសាងសំណង់ថ្មីៗ ដោយរក្សាអគារចាស់ៗដែលជាសម្បត្តិបេតិកភ័ណ្ឌ ផ្អែកទៅលើគុណភាពរបស់សំណង់ដែរ ព្រោះអគារចាស់ៗខ្លះមានសភាពទ្រុឌទ្រោមដែលយើងមិនអាចទុកបាន ព្រោះវាអាចបង្កគ្រោះថ្នាក់ ដល់ប្រជាពលរដ្ឋ។

សម្ដេចបានបង្ហាញបន្ថែមថា កម្ពុជាបានរក្សាទុកនូវអគារចាស់ៗមួយចំនួនដែលរឹងមាំ រួមមានវិមានព្រឹទ្ធសភាជាដើម ដែលជាកេរដំណែលរបស់ព្រះករុណា នរោត្តមសីហនុ កាលពីព្រះអង្គនៅជាព្រះប្រមុខរដ្ឋ និងបានសាងសង់សំណង់អគារថ្មីៗបន្ថែម រួមទាំងខិតខំរក្សានូវអគារចាស់ៗទាំងនៅរាជធានីភ្នំពេញ និងនៅតាមបណ្ដាខេត្តនានាផងដែរ។

ទន្ទឹមនឹងនេះដែរ សម្តេច បានស្នើដល់ភាគីបារាំងបង្កើតមជ្ឈមណ្ឌលភាសាបារាំងឡើងវិញ ខណៈដែលបច្ចុប្បន្ន កម្ពុជា មានអ្នកនិយាយភាសាបារាំងរហូតដល់ទៅ៣៧% ច្រើនជាងគេក្នុងចំណោមប្រទេសហ្វ្រង់កូហ្វូនី ដែលរួមមាន កម្ពុជា វៀតណាម ឡាវ ថៃ។

គួរបញ្ជាក់ថា ប្រាសាទកោះកេរ ដែលល្បីថាជាប្រាសាទពីរ៉ាមីតខ្មែរ ត្រូវបានចុះបញ្ជីជាសម្បត្តិបេតិកភណ្ឌពិភពលោក នៅថ្ងៃទី១៧ ខែកញ្ញា ឆ្នាំ២០២៣នេះ តាមការសម្រេចជាឯកច្ឆ័ន្ទដោយសេចក្តីសម្រេចលេខ ៤៥ COM 8B.8 របស់ណៈកម្មាធិការបេតិកភណ្ឌពិភពលោកនៃអង្គការយូណេស្កូ ក្នុងសម័យប្រជុំទី៤៥ នៅទីក្រុងរីយ៉ាដ ប្រទេសអារ៉ាប៊ីសាអ៊ូឌីត។ (អានបន្ថែម)

- Video Advertisement -