ភ្នាក់ងារអចលនទ្រព្យថ្មីៗបង្ហាញពីវិសាលភាពនៃកំណើនអចលនទ្រព្យ

• Me Wathana
• 15 ខែ​មេសា 2016
• ព័ត៌មានក្នុងស្រុក
• 122 មើល

ដោយសារតែកំណើនដែលប្រកបដោយថាមវ័ន្ត និងចីរភាព ធ្វើឲ្យទីផ្សារអចលនទ្រព្យនៅកម្ពុជាឥឡូវនេះឈរជើងយ៉ាងរឹងមាំនៅក្នុងដែនទីផ្សារអន្តរជាតិ ហើយទាក់ទាញអ្នកវិនិយោគ និងភ្នាក់ងារអចលនទ្រព្យអន្តរជាតិជាច្រើនមកកាន់ប្រទេសកម្ពុជា ដែលក្នុងនោះក៏មានមកពីតៃវ៉ាន់ផងដែរ។

ក្រុមហ៊ុន Century 21 Regent Realty គឺជាក្រុមហ៊ុនមួយក្នុងចំណោមក្រុមហ៊ុនអចលនទ្រព្យនៅតៃវ៉ាន់ដែលបានបើកប្រតិបត្តិជាលើកដំបូងនៅកម្ពុជា ដែលក្រុមហ៊ុននេះបានចូលមកក្នុងប្រទេសកម្ពុជានៅចុងខែធ្នូ​ ឆ្នាំមុន ក្រោមឆ័ត្ររបស់ក្រុមហ៊ុន Century 21 ។

សាខារបស់ក្រុមហ៊ុននេះនៅកម្ពុជា ត្រូវបានគ្រប់គ្រងនិងដំណើរការដោយក្រុមហ៊ុន Century 21 របស់តៃវ៉ាន់ដែលជាក្រុមហ៊ុនមួយមានបទពិសោធន៍ជាង ២០ ឆ្នាំក្នុងអាជីវកម្មអចលនទ្រព្យនៅតៃវ៉ាន់។

លោក ម៉ាត់ យី នាយកប្រតិបត្តិនៃក្រុមហ៊ុន Century 21 Regent Realty បានលើកឡើងថា ដោយមើលឃើញលំហូរនៃការវិនិយោគយ៉ាងច្រើនពីតៃវ៉ាន់មកកាន់ប្រទេសកម្ពុជា ព្រោះទីផ្សារអចលនទ្រព្យនៅតៃវ៉ាន់មានភាពនៅទ្រឹង បានជំរុញឲ្យលោកមកកាន់ប្រទេសកម្ពុជាដើម្បីចាប់យកចំណែកទីផ្សារសម្រាប់តៃវ៉ាន។

លោកបានលើកឡើងថា យើងក៏ព្យាករណ៍ឃើញនិន្នាការនៃការអភិវឌ្ឍវិស័យអចលនទ្រព្យ ដែលនឹងបម្រើអតិថិជនតៃវ៉ាន់នៅក្នុងពេលអនាគតផងដែរ ហើយសហគមន៍សេដ្ឋកិច្ចអាស៊ានខាងមុខនឹងផ្តល់ឱកាសអភិវឌ្ឍន៍សេដ្ឋកិច្ចដល់ប្រទេសកម្ពុជា ព្រមទាំងឱកាសដើម្បីបង្កើនប្រាក់ចំណេញអាជីវកម្មផងដែរ។

លោក ម៉ាត់ យី បានរំឭកថាវិនិយោគិនអន្តរជាតិ ដែលកំពុងគ្រប់គ្រងអាជីវកម្មនៅបរទេស ជាញឹកញាប់អាចជួបប្រទះបញ្ហាប្រឈមជាច្រើន ហើយអ្នកវិនិយោគត្រូវយល់ពីបរិបទនយោបាយ វប្បធម៌ និងបរិស្ថាននៅក្នុងតំបន់។ នេះជាមូលហេតុចម្បងដែលលោកពឹងផ្អែកទៅលើកេរ្តិ៍ឈ្មោះរបស់ក្រុមហ៊ុន Century 21 ដែលត្រូវបានចាត់ទុកថាជាក្រុមហ៊ុនឈ្មួញកណ្តាលក្នុងវិស័យអចលនទ្រព្យល្បីល្បាញទូទាំងពិភពលោកដើម្បីជួយឲ្យជំនួញក្នុងវិស័យនេះរីកចំរើនខ្លាំងនៅក្នុងប្រទេសកម្ពុជា៕