រដ្ឋគ្រោងអភិវឌ្ឍត្បូងឃ្មុំជាខេត្តអព្យាក្រឹតកាបូន ដើម្បីលើកកម្ពស់គុណភាពជីវិតប្រចាំថ្ងៃរបស់ពលរដ្ឋ

Sommana Yan
16 ខែមីនា 2023
ព័ត៌មានក្នុងស្រុក
145 មើល

មន្ត្រីជាន់ខ្ពស់ក្រសួងបរិស្ថាន បានប្រកាសឱ្យរួបរួមគ្នាកសាងនិងអភិវឌ្ឍន៍ខេត្តត្បូងឃ្មុំ ឲ្យក្លាយជាខេត្តអព្យាក្រឹតកាបូន។ នេះជាការលើកឡើងរបស់ ឯកឧត្តម អ៊ាង សុផល្លែត រដ្ឋលេខាធិការក្រសួងបរិស្ថាន ក្នុងកិច្ចប្រជុំពិនិត្យបូកសរុបការងារបរិស្ថានខេត្តត្បូងឃ្មុំឆ្នាំ២0២២ និងលើកទិសដៅអនុវត្តបន្តឆ្នាំ២០២៣ នាព្រឹកថ្ងៃទី១៦ ខែមីនា ឆ្នាំ២០២៣។

គោលបំណងនៃការចង់ប្រែក្លាយខេត្តត្បូងឃ្មុំឲ្យក្លាយជាខេត្តអព្យាក្រឹតកាបូន គឺដើម្បីធានាលើកកម្ពស់គុណភាពជីវិតរស់នៅប្រចាំថ្ងៃ របស់ប្រជាពលរដ្ឋយើង និងការអភិវឌ្ឍប្រកបដោចីរភាព។

ជាមួយគ្នានេះផងដែរ ខេត្តត្បូងឃ្មុំ បានចុះផ្សព្វផ្សាយអប់រំចំណេះដឹងបរិស្ថាន ការគ្រប់គ្រងសំរាមសំណងរឹង សំណល់ផ្លាស្ទិក ដើម្បីភូមិស្អាត សហគមន៍ស្អាត ផ្លូវសាធារណស្អាត។

ជាពិសេស អាជ្ញាធរខេត្តបានបានចុះត្រួតពិនិត្យប្រភពបំពុលបរិស្ថាន តាមបណ្តារោងចក្រ សហគ្រាស ក្រុមហ៊ុន សិប្បកម្ម និងអាជីវកម្ម បានចំនួន ៦៨ទីតាំង ក្នុងនោះ ក្រុងសួង ១៤ទីតាំង ស្រុកត្បូងឃ្មុំ ១៩ទីតាំង ស្រុកអូររាំងឪ ០៦ទីតាំង ស្រុកតំបែរ១១ ទីតាំងស្រុកមេមត់ ០៧ទីតាំង និងស្រុកពញាក្រែក ចំនួន ១១ទីតាំង។ មន្ទីរបរិស្ថានខេត្តត្បូងឃ្មុំ បានសហការជាមួយក្រុមការងារក្រសួងបរិស្ថាន បានចំនួន ០៦ទីតាំង ក្នុងនោះ ស្រុកតំបែរ ១ទីតាំង,ស្រុកមេមត់ ២ទីតាំង,ស្រុកពញាក្រែក ៣ទីតាំង។

បន្ថែមពីនេះ អាជ្ញាធរខេត្តត្បូងឃ្មុំ បានចុះប្រមូលទិន្នន័យការប្រើប្រាស់សារធាតុធ្វើឱ្យត្រជាក់ និងបរិក្ខារត្រជាក់ ម៉ាស៊ីនត្រជាក់ សេវាកម្មជួសជុលម៉ាស៊ីនត្រជាក់ និងយានដ្ឋានជួសជុលរថយន្ត នៅក្នុងខេត្តត្បូងឃ្មុំ បានចំនួន ៥៤ទីតាំង។

- Video Advertisement -