រោងចក្រកៅស៊ូក្រាលថ្នល់ CCES ឆ្ពោះទៅរកភាពរីកចំរើនបន្ថែមទៀត

• Proeksa Meas
• 9 ខែ​កក្កដា 2016
• ព័ត៌មានសំណង់
• 385 មើល

ក្រុមហ៊ុន CCES Engineering Service Co., Ltd. បានចាប់ផ្តើមយ៉ាងរឹងមាំនៅក្នុងការផ្តល់សេវាកម្មដំឡើងឧបករណ៍ទូរគមនាគមន៍នៅក្នុងឆ្នាំ ២០១០ ហើយបច្ចុប្បន្ននេះបានក្លាយជាផ្នែកសំខាន់មួយនៃការអភិវឌ្ឍហេដ្ឋារចនាសម្ព័ន្ធកម្ពុជាក្នុងវិស័យផ្លូវថ្នល់។

ចាប់តាំងពីពេលដែលប្រទេសកម្ពុជា ដាក់មូលនិធិយ៉ាងច្រើនទៅក្នុងវិស័យហេដ្ឋារចនាសម្ព័ន្ធផ្លូវថ្នល់មក គឺចាប់ផ្តើមមានកម្លាំងបន្តជំរុញលើការងារធ្វើឲ្យប្រសើរឡើងនូវផ្លូវថ្នល់ធំៗនៅទូទាំងប្រទេស។ ខណៈពេលដែលការងារជាច្រើនត្រូវបានបញ្ចប់ ក៏នៅមានការងារជាច្រើនទៀតដែលត្រូវការធ្វើឲ្យហើយ។ ដូចនេះ ភាពអាចរកបានងាយស្រួលនូវរោងចក្រផលិតកៅស៊ូក្រាលថ្នល់ គឺជាកត្តាសំខាន់ជំរុញសន្ទុះកំណើននៅក្នុងវិស័យផ្លូវថ្នល់នេះ។

លោក ជុំ ហួត នាយកគ្រប់គ្រង និងជាម្ចាស់ CCES បានបោះជំហានមួយកម្រិតទៀតនៅក្នុងមុខជំនួញរបស់ខ្លួន ដោយបង្កើតនូវរោងចក្រថ្មីមួយលើផ្ទៃដី ៧.៩២៦ ម៉ែត្រការ៉េ ដែលជារោងចក្រលាយកៅស៊ូក្រាលថ្នល់ស្ថិតនៅក្នុងខណ្ឌពោធិ៍សែនជ័យ រាជធានីភ្នំពេញ ក្នុងឆ្នាំ ២០១៥ ។

លោកបានឲ្យដឹងថា គោលនយោបាយរបស់ក្រុមហ៊ុន CCES គឺផ្តល់ឲ្យអតិថិជននូវគុណភាពខ្ពស់បំផុត បច្ចេកវិទ្យាសម័យទំនើបប្រកបដោយភាពច្នៃប្រឌិត និងសំបូរបែបបំផុតនៅលើទីផ្សារ ដើម្បីធានានូវលទ្ធផលល្អបំផុតខាងគុណភាព និងរយៈពេលនៃសេវាកម្ម។ ក្រុមហ៊ុន CCES គ្រោងនឹងពង្រីកខ្លួននៅទូទាំងតំបន់ ដោយបង្កើតនូវហាងតែមួយតែមានអ្វីគ្រប់យ៉ាងសម្រាប់ការងារហេដ្ឋារចនាសម្ព័ន្ធផ្លូវថ្នល់នៅពេលអនាគតខាងមុខ។

លោកបានមានប្រសាសន៍ថា “ក្រុមហ៊ុន CCES ឥឡូវនេះមានសមត្ថភាពផលិតល្បាយកៅស៊ូក្រាលថ្នល់ ក្នុងបរិមាណ ៤០ តោនក្នុងមួយម៉ោង ដែលនេះនឹងជួយឲ្យយើងផ្គត់ផ្គង់នូវតម្រូវការរបស់អតិថិជនបច្ចុប្បន្នរបស់យើង។ យើងក៏កំពុងផ្តល់សេវាពេញលេញរាប់ចាប់តាំងពីការសិក្សាវាស់ស្ទង់នៅការដ្ឋាន រហូតដល់បញ្ចប់ការងារសាងសង់ផ្លូវក្រាលកៅស៊ូ ដោយការក្រាលថ្មខ្លួនយើងផ្ទាល់ និងឧបករណ៍ផ្សេងទៀតរបស់យើង។”

ល្បាយកៅស៊ូក្រាលថ្នល់របស់ក្រុមហ៊ុន CCES ត្រូវបានធ្វើតេស្តសាកល្បង និងបញ្ជាក់ការទទួលស្គាល់ពីក្រសួងសាធារណការ និងដឹកជញ្ជូន ព្រមទាំងស្ថាប័នផ្សេងទៀត។

ដោយកៅស៊ូ គឺជាសម្ភារដ៏សំខាន់សម្រាប់ការអភិវឌ្ឍហេដ្ឋារចនាសម្ព័ន្ធផ្លូវថ្នល់នៅក្នុងប្រទេសកម្ពុជា ដូចនេះ គេត្រូវតែយកចិត្តទុកដាក់យ៉ាងខ្លាំងក្នុងការធ្វើឲ្យប្រសើរឡើងនូវលក្ខណៈរបស់កៅស៊ូ ការងារសាងសង់ប្រសិទ្ធភាពរបស់កៅស៊ូនេះ និងការថែរក្សាបរិស្ថានផងដែរ។