ស្ពានទស្សនីយភាពកញ្ចក់ដ៏អាស្ចារ្យរបស់ចិនត្រូវបានបិទបន្ទាប់ពីពេលពីរសប្តាហ៍

• Proeksa Meas
• 6 ខែ​ធ្នូ 2016
• Uncategorized
• 206 មើល

ចំនួនភ្ញៀវទេសចរណ៍ដ៏ច្រើនលើសលុប បានបង្ខំឲ្យមានការបិទស្ពានកញ្ចក់ដ៏វែងបំផុតក្នុងពិភពលោករបស់ប្រទេសចិន ក្នុងរយៈពេលត្រឹមតែ ១៣ថ្ងៃ បន្ទាប់ពីមានការផ្សព្វផ្សាយព័ត៌មានជាសកលស្តីពីការបើកឲ្យចូលទស្សនាស្ពាននេះ។

អាជ្ញាធរបានអះអាងថាស្ពានដ៏អស្ចារ្យនេះត្រូវបានបិទនៅថ្ងៃទី ២ ខែកញ្ញា ដោយសារតែចំនួនភ្ញៀវទេសចរណ៍មានចំនួនខ្ពស់ជាងចំនួនភ្ញៀវទេសចរណ៍ដែលអាចទទួលបានដល់ទៅ១០ដង ដែលក្នុងនោះក្នុងមួយថ្ងៃស្ពាននេះអាចអនុញ្ញាតឲ្យភ្ញៀវចូលទស្សនាត្រឹមតែ ៨.០០០នាក់ប៉ុណ្ណោះ។ ទោះជាយ៉ាងណា ក្រុមអាជ្ញាធរបានទទួលស្គាល់ថា ពិតជាមានតម្រូវការក្នុងការធ្វើឲ្យប្រសើរឡើងថែមទៀតនូវរចនាសម្ព័ន្ធរបស់ស្ពានជាបន្ទាន់។

ស្ពានដែលមានប្រវែងជិតជិតកន្លះគីឡូម៉ែត្រ (៤៣០ម៉ែត) និងចំណាយទឹកប្រាក់ ៣៤លានដុល្លារនេះ គឺជាស្ពានដែលភ្ជាប់ទីខ្ពស់ចំនួនពីរក្នុងតំបន់ភ្នំ Zhangjiajie នៃខេត្ត Hunan ដោយមានរយៈកម្ពស់ ៣០០ម៉ែតពីដី។ ស្ពាននេះត្រូវបានរចនាឡើងដោយស្ថាបត្យករអ៊ីស្រាអែលឈ្មោះ Haim Dotan ដោយមានទទឹងប្រវែង ៦ម៉ែត្រ និងធ្វើឡើងពីបន្ទះកញ្ចក់ចំនួន ៩៩ផ្ទាំង។

ស្ពាននេះបានបើកទទួលភ្ញៀវទេសចរណ៍ឡើងវិញនៅដើមខែតុលា ក្រោយពីមានការធ្វើតេស្តសុវត្ថិភាព។