៥ឆ្នាំចុងក្រោយនេះ មានរោងចក្រចំនួន ១៩៤៧ និងសហគ្រាសធុនតូច-មធ្យមជាង ៤៣ម៉ឺន បានចុះបញ្ជីថ្មី

• Sommana Yan
• 11 ខែ​សីហា 2022
• 166 មើល

គិតត្រឹមរយៈពេល ៥ឆ្នាំចុងក្រោយ មកទល់នឹងខែកក្កដា ឆ្នាំ២០២២នេះ ក្រសួងឧស្សាហកម្ម វិទ្យាសាស្ត្រ បច្ចេក​វិទ្យា និង​​នវានុវត្តន៍ បានចុះបញ្ជីរោងចក្របានចំនួន ១៩៤៧ ទីតាំង ដែលបង្កើតការងារបានចំនួន១ ០៤៤ ២២៦ កន្លែង​។ នេះបើតាមការលើកឡើងរបស់ ឯកឧត្តម ហេង សុខគង់ រដ្ឋលេខាធិការ​របស់​ក្រសួង​ឧស្សាហកម្ម ក្នុងសន្និសីទសារព័ត៌មាន នៅថ្ងៃទី១១ ខែសីហា ឆ្នាំ២០២២។

ជាមួយគ្នានេះផងដែរ បច្ចុប្បន្ននេះ កម្ពុជាមានសួនឧស្សាហកម្មចំនួន ១៣កន្លែង មានរោងចក្រចំនួន ៨៥ទីតាំង បង្កើតការងារបានចំនួន ៦២៦២៦ នាក់ ដែលទុនវិនិយោគសរុប ៤០៣​ លានដុល្លារអាមេរិក។

ខណៈនេះផងដែរ ក្នុងរយៈពេល ៥ឆ្នាំចុងក្រោយនេះ ចំនួនសហគ្រាសធុនតូច និងមធ្យមក្នុងវិស័យកម្មន្តសាល ចុះបញ្ជីបានចំនួន ៤៣៨១៣មូលដ្ឋន បង្កើតការងារបាន ៤៤២៨៣៨នាក់ ដែលមានការកើនឡើងចំនួន ៤៤២៣ មូល​ដ្ឋាន បើធៀបនឹង ៥ឆ្នាំមុន ស្មើនឹង១១,២២ %។

ដោយឡែក គិតត្រឹម៧ខែដំបូង ដើមឆ្នាំ២០២២ នេះ ចំនួនសហគ្រាសធុនតូច និងមធ្យម បានចុះបញ្ជីបង្កើតថ្មីបាន១០៣ មូលដ្ឋាន និងបង្កើតការងារបានចំនួន ១៤១២នាក់។

ក្នុងឆ្នាំ២០២៥ វិស័យឧស្សាហកម្ម ត្រូវបានរំពឹងទុកថានឹងរួមចំណែកក្នុងផលិតផលក្នុងស្រុកសរុប (ផ.ស.ស) ​ចំនួន ៣០% ហើយក្នុងឆ្នាំ២០២២ នេះ តាមការប៉ាន់ស្មាន វិស័យនេះអាចមានកំណើនដល់ ៣៩,៩០% ដែលចូលរួម​ចំណែក​ក្នុង​ ផ.ស.ស។

គួរបញ្ជាក់ថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍​ បានបញ្ចប់នូវ​សេចក្តីព្រាង​អនុក្រឹត្យស្តីពី​បណ្តុំ​​​សហគ្រាសធុនតូច និងមធ្យម រួចរាល់ហើយ ដែលអនុក្រឹត្យនេះ សំដៅលើកកម្ពស់​វិស័យ​សហគ្រាសធុ​ន​តូច និងមធ្យម ដែលជាឆ្អឹងខ្នងសេដ្ឋកិច្ចជាតិ។