Atkins នឹងអភិវឌ្ឍអគារភ្លោះកម្ពស់កប់ពពកនៅវៀតណាម

• Proeksa Meas
• 17 ខែ​កក្កដា 2017
• ព័ត៌មានសំណង់
• 319 មើល

Atkins ជាក្រុមហ៊ុនផ្តល់សេវាកម្មរចនាប្លង់ស្ថាបត្យកម្ម គ្រប់គ្រងគម្រោង និងប្រឹក្សាយោបល់ ដែលមានមូលដ្ឋានការិយាល័យស្ថិតនៅចក្រភពអង់គ្លេស ទទួលបានការចុះកុងត្រាពីក្រុមហ៊ុនអភិវឌ្ឍ Empire Group ដើម្បីរចនាផ្នែកស្ថាបត្យកម្ម និងផ្នែកខាងក្នុងនៃអគារភ្លោះមួយ មានឈ្មោះថា Cocobay Tower Danang កម្ពស់ ២០០ម៉ែត្រ ដែលស្ថិតនៅក្នុងទីក្រុង ដាណាង ប្រទេសវៀតណាម។

ទន្ទឹមនឹងនេះដែរ ក្រុមហ៊ុន Empire Group ជាក្រុមហ៊ុនអភិវឌ្ឍអចលនទ្រព្យឈានមុនគេនៅប្រទេសវៀតណាម ទទួលបានការអភិវឌ្ឍន៍លើផ្នែកមជ្ឈមណ្ឌលកំសាន្ត និងអគារខុនដូ ប្រណីត នៅក្នុងអគារភ្លោះនេះ ដែលគ្រប់ដណ្តប់លើផ្ទៃដី ៣១ហិចតា ហើយផ្ទៃក្រឡានៃអគារទាំងពីរមាន ១៤៥.០០០ ម៉ែត្រការ៉េ។

អគារកម្ពស់កប់ពពកមួយនេះត្រូវបានតភ្ជាប់គ្នាដោយស្ពានកញ្ចក់រាងកោងជារង្វង់នៅកំពូល ខាងលើនៃជាន់ទី៤៨ ប្រវែង ៥២ម៉ែត្រ ដែលផ្តល់នូវទិដ្ឋភាពល្អស្រស់ត្រកាលតាមបណ្តោយឆ្នេរ។

ដាណាង ជាទីក្រុងធំជាងគេបង្អស់ទីបីនៅប្រទេសវៀតណាម ហើយក៏ជាទីក្រុងមួយដែលមានការរីកចម្រើនយ៉ាងឆាប់រហ័សផងដែរ ខណៈដែលទីក្រុងមួយនេះជាមជ្ឈមណ្ឌលទិសដៅនៃវិស័យទេសចរណ៍ ហើយគេរំពឹងថានឹងមានភ្ញៀវេទេសចរណ៍មកកំសាន្ត ១.៦លាននាក់នៅ ឆ្នាំ២០១៧នេះ។

គួរជម្រាបថា អគារ Cocobay Tower Danang គ្រោងនឹងចាប់់ផ្តើមសាងសង់នៅចុងឆ្នាំ២០១៧ នេះហើយ។