អូស្ត្រាលីវិនិយោគ ១០ លានដុល្លារ ជួយពង្រឹងសក្តានុពលលើការកែច្នៃគ្រាប់ស្វាយចន្ទីនៅកម្ពុជា

Proeksa Meas
18 ខែសីហា 2026
ព័ត៌មានសំណង់
185 មើល

ដោយសហការជាមួយក្រុមហ៊ុនឈានមុខគេលើវិស័យកសិ-ឧស្សាហកម្ម Olam Food Ingredients គំនិតផ្តួចផ្តើមនេះមានគោលបំណងពង្រីកការកែច្នៃប្រចាំថ្ងៃចំនួន ៨០ តោន ស្តារប្រាក់ចំណូលប្រចាំឆ្នាំដែលបាត់បង់ជាង ១២៥ លានដុល្លារ និងការពារកសិករក្នុងស្រុកពីការប្រែប្រួលទីផ្សារ

ស្ថានទូតអូស្រ្តាលីប្រចាំព្រះរាជាណាចក្រកម្ពុជា កាលពីចុងសប្តាហ៍បានឱ្យដឹងថា អូស្ត្រាលីជំរុញការវិនិយោគរហូតដល់ ១០ លានដុល្លារអាម៉េរិក ជួយពង្រឹងសក្តានុពលនៃការកែច្នៃគ្រាប់ស្វាយចន្ទីនៅកម្ពុជាឱ្យកាន់តែមានសន្ទុះបន្ថែមទៀត។

ស្ថានទូតអូស្រ្តាលី បានបន្តថា កម្ពុជាគឺជាប្រទេសផលិតគ្រាប់ស្វាយចន្ទីឆៅធំជាងគេលំដាប់ទីពីរនៅលើពិភពលោក ប៉ុន្តែមានតែ ៥% ប៉ុណ្ណោះនៃទិន្នផលសរុបដែលត្រូវបានកែច្នៃនៅក្នុងប្រទេស។ ការខ្វះខាតសមត្ថភាពកែច្នៃក្នុងស្រុកនេះ ធ្វើឱ្យកម្ពុជាបាត់បង់ចំណូលសក្តានុពលជាង ១២៥ លានដុល្លារ ក្នុងមួយឆ្នាំ ខណៈដែលកសិករ និងពាណិជ្ជករនៅតែប្រឈមនឹងហានិភ័យពីការប្រែប្រួលតម្លៃទីផ្សារ។

ហេតុនេះហើយ ទើបអូស្ត្រាលីកំពុងសហការជាមួយក្រុមហ៊ុន Olam Food Ingredients (ofi) ដែលជាក្រុមហ៊ុនកសិពាណិជ្ជកម្មសកល មានចំណែកពី ២០ ទៅ ២៥% នៃទីផ្សារគ្រាប់ស្វាយចន្ទីពិភពលោក ដើម្បីបង្កើនសមត្ថភាពកែច្នៃគ្រាប់ស្វាយចន្ទីចំនួន ៨០ តោនក្នុងមួយថ្ងៃ និងជំរុញការវិនិយោគរហូតដល់ ១០ លានដុល្លារ ក្នុងវិស័យកែច្នៃគ្រាប់ស្វាយចន្ទីនៅកម្ពុជា។ នេះបើតាមការបញ្ជាក់បន្ថែមពីស្ថានទូតអូស្រ្តាលី។

ជាថ្មីម្តីម្តងទៀត ស្ថានទូតអូស្ត្រាលី ក៏បានបន្តប្តេជ្ញាទាក់ទាញការវិនិយោគប្រកបដោយគុណភាព ដែលបង្កើតការងារ និងគាំទ្រដល់អាជីវកម្ម ដើម្បីជួយកម្ពុជាកសាងសេដ្ឋកិច្ចរឹងមាំ និងវិបុលភាពផងដែរ៕ (អានបន្ថែម)