អូស្ត្រាលីសហការជាមួយរោងចក្រចំនួន២ ដើម្បីជួយពង្រឹងសមត្ថភាពកែច្នៃគ្រាប់ស្វាយចន្ទីនៅកម្ពុជា

Sommana Yan
12 ខែឧសភា 2026
ព័ត៌មានអចលនទ្រព្យ
412 មើល

ប្រទេសអូស្ត្រាលី បានសហការជាមួយរោងចក្រចំនួន២ ដើម្បីជួយពង្រឹងសមត្ថភាពកែច្នៃគ្រាប់ស្វាយចន្ទីនៅកម្ពុជា សំដៅឈានទៅអភិវឌ្ឍវិស័យកសិ-ចំណីអាហារនៅកម្ពុជា។ នេះបើយោងតាមការចុះផ្សាយរបស់ស្ថានទូតអូស្រ្តាលីប្រចាំកម្ពុជា កាលពីថ្ងៃទី៦ ខែឧសភា ឆ្នាំ២០២៦។

ស្ថានទូតអូស្រ្តាលីបានឱ្យដឹងថា ប្រទេសអូស្រ្តាលីបានប្តេជ្ញាសហការជាមួយកសិ-ពាណិជ្ជកម្មកម្ពុជា ដើម្បីពង្រឹងសមត្ថភាពរបស់ពួកគេ ទាក់ទាញវិនិយោគ និងអភិវឌ្ឍវិស័យកសិ-ចំណីអាហារឲ្យកាន់តែរឹងមាំ និងចីរភាព។

ទូតអូស្រ្តាលីបញ្ជាក់ថា កម្ពុជាគឺជាប្រទេសផលិតគ្រាប់ស្វាយចន្ទីឆៅធំជាងគេលំដាប់ទី២ លើពិភពលោក ប៉ុន្តែមានតិចជាង ១០% ប៉ុណ្ណោះនៃផលិតផលសរុបត្រូវបានកែច្នៃក្នុងស្រុក។ ហេតុនេះ អូស្ត្រាលីកំពុងសហការជាមួយរោងចក្រកែច្នៃគ្រាប់ស្វាយចន្ទីចំនួន ២ ដើម្បីគាំទ្រក្នុងការសាងសង់ទីធ្លាសម្ងួត បំពាក់ម៉ាស៊ីនចាត់ថ្នាក់ និងកន្លែងស្តុកទុក ព្រមទាំងផ្តល់ការបណ្តុះបណ្តាលបន្ទាប់ពីការប្រមូលផលដល់កសិករដាំស្វាយចន្ទី។

បើតាមស្ថានទូតអូស្រ្តាលី គម្រោងនេះនឹងបង្កើតការងារថ្មីប្រហែល ១០០ កន្លែង និងជួយបង្កើន ឬរក្សាស្ថិរភាពប្រាក់ចំណូលសម្រាប់គ្រួសាររហូតដល់ ១,០០០ នៅខេត្តកំពង់ធំ និងខេត្តព្រះវិហារ។ សូមរំឭកថា កន្លងមកថ្មី ក្រោមកម្មវិធីជំនួយអូស្រ្តាលី កម្ពុជាក៏ធ្លាប់បានចុះកិច្ចសហប្រតិបត្តិការពាណិជ្ជកម្មលើវិស័យកសិកម្ម ដូចជាការនាំចេញអង្ករកម្ពុជាទៅកាន់ប្រទេសអូស្រ្តាលីជាដើម។ល។ (អានបន្ថែម)